SABAH qruplarında oxumaq istəyənlər ixtisas seçimində bunu qeyd etməlidirlərmi?

SABAH qruplarında oxumaq istəyənlər ixtisas seçimində bunu qeyd etməlidirlərmi?

Bir müddət əvvəl SABAH qruplarına tələbə qəbulu ilə bağlı mühüm yeniliklər ictimaiyyətə elan edilib. Əvvəllər tələbələr yalnız II kursdan SABAH qruplarına qəbul olunduqları halda artıq I kursdan bu qruplarda təhsil ala biləcəklər. Bu isə o deməkdir ki, tələbələr artıq birinci tədris ilindən SABAH qruplarının təqdim etdiyi imkanlardan faydalanacaqlar.

Rəsmi məlumata əsasən, artıq SABAH qruplarına qəbul Dövlət İmtahan Mərkəzinin keçirdiyi buraxılış və qəbul imtahanlarında toplanan nəticələr əsasında, eyni zamanda müəyyən mərhələdə keçiriləcək müsahibə vasitəsilə həyata keçiriləcək.

Qeyd edək ki, proqramın əhatə dairəsi də genişləndirilir. Artıq həm bakalavriat və magistratura, həm də doktorantura səviyyəsində müxtəlif istiqamətlər üzrə SABAH qruplarının təşkili planlaşdırılır. Bu da xüsusi istedadlı tələbələrin daha geniş spektr üzrə bu proqramda iştirakını təmin edəcək.

İndi isə ali məktəblərə ixtisas seçimi dövrüdür. Artıq bir neçə gün sonra abituriyentlər ali təhsil almaq istədikləri müəssisə və ixtisas seçimini yekunlaşdıracaqlar. Buna görə də ixtisas seçimi dövründə  abituriyentləri maraqlandıran əsas suallardan biri budur: SABAH qruplarına daxil olmaq üçün ixtisas seçimi ilə yanaşı, SABAH qruplarına qeydiyyat da aparılacaqmı?

Məsələ ilə bağlı SABAH qrupları İcra Komitəsindən "Azərbaycan müəllimi"nin sorğusuna cavab olaraq bildirilib ki, abituriyentlərin ixtisas seçimi mərhələsində SABAH qrupları ayrıca qeyd olunmur. Abituriyentlər əvvəlcə ümumi qaydada ali təhsil müəssisəsinə qəbul olunacaqlar. Qəbul prosesi başa çatdıqdan və tələbələr ali məktəblərdə qeydiyyatdan keçdikdən sonra SABAH proqramı tətbiq edilən universitetlərdə əlavə seçim mərhələsi təşkil olunacaq. Yalnız həmin mərhələdə SABAH qruplarına tələbə qəbulu aparılacaq.