TAU-da yeni ixtisasların açılması planlaşdırılır

“Türkiyə–Azərbaycan Universitetində (TAU) mövcud ixtisaslarla yanaşı, yeni ixtisasların da açılması nəzərdə tutulur”.

“Azərbaycan müəllimi”nin məlumatına görə, bu barədə universitetin Qida mühəndisliyi proqramının rəhbəri Ümran Uygun "CBC FM"də yayımlanan proqramda məlumat verib.

O bildirib ki, qida mühəndisliyi ilə paralel olaraq Hacettepe Üniversitesi ilə əməkdaşlıq çərçivəsində kimya mühəndisliyi proqramının yaradılması müzakirə olunur.

Ümran Uygun qeyd edib ki, Azərbaycanda kimya mühəndisliyi əsasən neft sənayesinə yönəlib. Halbuki müdafiə sənayesi üçün, xüsusilə partlayıcı maddələr və digər spesifik sahələr üzrə ixtisaslaşmış kadrlara ehtiyac var. Bu baxımdan yeni proqramın daha konkret missiya əsasında formalaşdırılması planlaşdırılır.

O əlavə edib ki, laboratoriya infrastrukturu baxımından qida və kimya mühəndisliyi proqramları arasında oxşarlıqlar mövcuddur və bu da yeni ixtisasın yaradılmasını asanlaşdıra bilər.

Bununla yanaşı, Orta Şərq Texniki Universiteti (ODTÜ) ilə əməkdaşlıq çərçivəsində elektronika mühəndisliyi istiqamətinin də açılması gündəmdədir. Eyni zamanda, sənayenin tələbləri nəzərə alınaraq data və proqramlaşdırma sahəsində yeni ixtisasların yaradılması da planlaşdırılır.