MDU-ya 116 yeni müəllim işə götürülüb

MDU-ya 116 yeni müəllim işə götürülüb

Mingəçevir Dövlət Universiteti (MDU) 2025/2026-cı tədris ili üçün 165 fənn üzrə sənayedə çalışan mütəxəssislər, həmçinin professor-müəllim heyəti üçün müraciət imkanları yaradıb. Bir ay davam edən prosesdə 853 namizəd sənədlərini təqdim edib.

İnsan resursları şöbəsinin müdiri Əmrah Qürbətov “Azərbaycan müəllimi”nə açıqlamasında bildirib ki, ilkin mərhələdə sənədlərin yoxlanışı aparılıb və müəyyən edilmiş meyarlara uyğun olaraq 267 namizəd növbəti mərhələyə buraxılıb. Onun sözlərinə görə, yekun qiymətləndirmə komissiya üzvlərinin qərarı ilə baş tutub və nəticədə ən yüksək göstəricilərə sahib 116 namizəd seçilib.

Ə.Qürbətov seçimdə iştirak edənlərin yaş bölgüsü barədə də danışaraq qeyd edib:

“Yeni müəllimlərimizin 49 faizi 20-29 yaş aralığındadır. Bu, universitetimizin gənc kadrlara verdiyi önəmin göstəricisidir. 35 faiz 30-39 yaş, 12 faiz 40-49 yaş aralığında, 4 faiz isə 50 yaş və üzərindədir. Bu balans həm dinamikanı, həm də təcrübəni bir araya gətirir”.

Namizədlərin profillərinə toxunan şöbə müdiri əlavə edib ki, işə götürülənlərin böyük hissəsini Mingəçevir Dövlət Universitetinin məzunları (43 faiz), digər əhəmiyyətli qismini isə sənaye nümayəndələri (25 faiz) təşkil edir. Həmçinin 32 faizi isə müxtəlif yerli və xarici ali təhsil müəssisələrinin məzunlarıdır: “Bu müxtəliflik bizim akademik mühitə həm təcrübə, həm də yeni baxış bucaqları gətirəcək”.

Yeni qəbul olunan əməkdaşlarla 1 illik sınaq müddətinə əmək müqaviləsi bağlanacaq. Əmrah Qürbətov bu barədə bildirib ki, müəllimlərdən yalnız ənənəvi dərs keçmək deyil, həm də müasir elmi və pedaqoji fəaliyyət gözlənilir:

“Onlardan “Scopus” və “Web of Science” kimi nüfuzlu bazalarda məqalələr dərc etmək, dərsləri praktiki yönümlü metodlarla aparmaq və tədrisə texnologiyaları fəal şəkildə inteqrasiya etmək tələb olunacaq”.

Fəaliyyətin davamlı izlənməsi məqsədilə universitetin Keyfiyyət şöbəsi mütəmadi monitorinqlər aparacaq, tələbələr arasında isə anonim sorğular təşkil ediləcək. Əmrah Qürbətov bunu belə izah edib:

“Bu yanaşma həm tədrisin keyfiyyətinin yüksəldilməsinə, həm də müəllimlərin peşəkar inkişafına dəstək olacaq”.

MDU rəhbərliyi yeni komandanın universitetin beynəlxalq nüfuzunun artırılmasına, tələbələrin isə uğurlu karyera yoluna dəyərli töhfə verəcəyinə inanır.

Qeyd edək ki, hazırda elan olunmuş digər vakant yerlər üzrə də müsahibə prosesi davam edir.