Azərbaycan komandaları “TEKNOFEST-2025 İstanbul”da yüksək nəticə əldə ediblər

Azərbaycan komandaları “TEKNOFEST-2025 İstanbul”da yüksək nəticə əldə ediblər

Azərbaycan universitetlərinin komandaları “TEKNOFEST-2025 İstanbul”da mühüm nailiyyətlər qazanıblar.

“Azərbaycan müəllimi” xəbər verir ki, sentyabrın 17-21-də İstanbulda keçirilən və dünyanın ən böyük aerokosmik və texnologiya festivalı hesab olunan “TEKNOFEST-2025”də Azərbaycan universitetlərinin komandaları müxtəlif kateqoriyalarda yüksək nəticələr əldə ediblər.

Bakı Dövlət Universitetinin “BSU SSTCC” komandası festivalın qaliblərindən olub. Komanda “Əngəlsiz həyat texnologiyaları” kateqoriyasında təqdim etdiyi “NeuroScreen” layihəsi ilə I yerə layiq görülüb. Layihə iflicli xəstələrin beyin siqnallarının oxunması və filtrlənməsi yolu ilə müxtəlif ağıllı ev texnologiyalarının, rəqəmsal cihazların və robot əsaslı orqanların idarəsini təmin etməklə yanaşı, xəstələrin sağlamlıq vəziyyətinin süni intellekt əsasında monitorinqini aparmaq məqsədi daşıyır.

Bakı Ali Neft Məktəbi (BANM) də festivalda bir neçə komanda ilə iştirak edərək uğurlu nəticələr göstərib. Belə ki:
    •    “Zəngəzur BHOS” komandası “Maliyyə texnologiyaları” kateqoriyasında “Ticarətləşmə potensialı” mükafatına layiq görülüb.
    •    “Daşaltı BHOS” komandası eyni kateqoriyada II yerin qalibi olub.
    •    “Xudafərin BHOS” komandası “Ağıllı nəqliyyat” kateqoriyasında III yeri tutub.
    •    “Aypara BHOS” komandası isə ASTROGUARD layihəsi ilə münsiflər heyətinin xüsusi mükafatına layiq görülüb.

Qeyd edək ki, bu il 96 ölkədən 565 mindən çox komanda festivalda iştirak üçün müraciət edib. BANM komandalarının uğurlu çıxışında isə İnnovasiya və Tədqiqatlar Mərkəzinin müdiri Emiliya Əhmədova və müəllim Aydın Nəsirzadə mentor kimi yaxından iştirak ediblər.