Naxçıvanda 3 mindən artıq uşaq məktəbəhazırlıq qrupunda təhsil alacaq

Naxçıvanda 3 mindən artıq uşaq məktəbəhazırlıq qrupunda təhsil alacaq

Oktyabrın 1-dən ölkədə, o cümlədən Naxçıvanda 2025-2026-ci tədris ili üzrə məktəbəhazırlıq qruplarında məşğələlər başlayıb. 

Naxçıvan Muxtar Respublikası Təhsil Nazirliyindən "Azərbaycan müəllimi"nə verilən məlumata görə, Naxçıvanda ümumilikdə 146 ümumtəhsil məktəbinin 206 məktəbəhazırlıq qrupuna 3 mindən artıq uşaq qəbul edilib.

Qeyd edək ki, elm və təhsil nazirinin müvafiq əmri ilə təsdiqlənən 2025-2026-cı tədris ili üzrə tədris planına uyğun olaraq, qəsəbə və kəndlərdə yerləşən ümumtəhsil məktəblərinin qrupları üçün yeni say həddinin müəyyənləşdirilməsi Naxçıvanın ucqar dağ kəndlərində də uşaqların tədrisə cəlb olunmasına şərait yaradıb. Ötən tədris ilində məktəbəhazırlıq qrupu 138 ümumtəhsil məktəbində təşkil olunmuşdusa, cari tədris ilində artıq 146 məktəbdə hazırlıq qrupları fəaliyyət göstərir. 

Məlumat üçün bildirək ki, məktəbəhazırlıq qruplarında “Ətraf aləmlə tanışlıq”, “Savad təliminə hazırlıq və nitq inkişafı”, “Bədii təfəkkürün inkişafı”, “Məntiqi və riyazi təfəkkürün inkişafı”, “Təsviri fəaliyyət”, “Musiqi”, “Fiziki mədəniyyət” məşğələləri keçirilir. Qruplarda gün ərzində 3, həftədə 4 gün olmaqla 12 məşğələ təşkil olunr. Bir məşğələnin müddəti 30 dəqiqə, məşğələlərarası fasilə isə 10 dəqiqə müəyyənləşdirilib və dərs ili iki yarımilə bölünür. Məşğələlər oktyabrın 1-də başlayıb, mayın 31-də başa çatır.