MİQ imtahanında iştirak edəcək namizədlərin NƏZƏRİNƏ!

MİQ imtahanında iştirak edəcək namizədlərin NƏZƏRİNƏ!

Müəllimlərin işə qəbulu (MİQ) üzrə keçiriləcək test imtahanı mərhələsində iştirak edəcək müəllimlərə bir sıra mühüm məqamlarla bağlı İnsan Resursları Mərkəzi tərəfindən xəbərdarlıq edilib.

"Azərbaycan müəllimi" xəbər verir ki, mərkəzin yaydığı məlumata əsasən, iştirakçılar yalnız şəxsi səhifələrində qeyd olunan tarix və məkanda imtahanda iştirak edə bilərlər. Bu tarix və məkan xaricində olan hər hansı digər seans və ya mərkəzdə iştirak etmək mümkün deyil.

Namizədlərin yalnız şəxsiyyət vəsiqəsi ilə imtahana gəlməsi tələb olunur. Həmçinin qeyd olunur ki, namizədi müşayiət edən şəxslər imtahan binasının ərazisinə buraxılmayacaq. Bu səbəbdən, namizədlərə tək gəlmələri tövsiyə edilir.

Bundan əlavə, namizədlər imtahan binasına su, digər içkilər, yemək, çanta və şəxsi əşyalar gətirməməlidirlər. İmtahan zamanı hər hansı sual və ya texniki uyğunsuzluq yaranarsa, namizəd səssiz şəkildə əlini qaldıraraq nəzarətçiyə müraciət etməlidir.

Eyni zamanda, imtahan başa çatdıqdan sonra nəzarətçinin icazəsi olmadan zal tərk edilməməlidir. Qaralama kağızlarının da imtahan zalından çıxarılması qadağandır.
Mərkəz bir daha namizədlərə imtahan və müsabiqə şərtlərinə ciddi riayət etməyi tövsiyə edir.