Başqa dillərdə dərs deyən müəllimlər üçün sertifikatlaşdırma qaydası necədir?

 

Ölkəmizdə Azərbaycan dili ilə yanaşı, digər dillərdə də tədris aparan dövlət ümumi təhsil məktəbləri var.

Elm və Təhsil Nazirliyindən “Azərbaycan müəllimi”nin sorğusuna cavab olaraq bildirilib ki, ölkə üzrə tədrisi Azərbaycan dili ilə yanaşı, digər dillərdə həyata keçirilən 313 məktəb fəaliyyət göstərir.

Nazirliyin məlumatına görə, həmin məktəblərdə yalnız digər dillərdə tədris aparan müəllimlərin sayı 712 nəfər təşkil edir.

Bəs bu müəllimlərin sertifikatlaşdırma prosesinə cəlbi hansı qaydada həyata keçirilir?

Məktəbəqədər və Ümumi Təhsil üzrə Dövlət Agentliyindən sorğumuza verilən açıqlamada qeyd olunub ki, “Dövlət ümumi təhsil müəssisələrində işləyən təhsilverənlərin sertifikatlaşdırma Qaydası”na əsasən, pedaqoji fəaliyyətlə məşğul olan, ali və orta ixtisas təhsilinə malik təhsilverənlər peşəkarlıq səviyyəsi və peşə yararlılığının yoxlanılması məqsədilə 5 ildə bir dəfə sertifikatlaşdırma prosesinə cəlb edilirlər.

Agentlik vurğulayıb ki, sertifikatlaşdırma zamanı bütün bölmələr, o cümlədən Azərbaycan və rus bölmələrində çalışan müəllimlərə eyni yanaşma tətbiq olunur.