MDU tələbələri Mingəçevirdə yeni yaşıllıq zonası saldılar

Mingəçevir Dövlət Universitetinin (MDU) tələbələri ekoloji təşəbbüslərlə sosial sahibkarlığı birləşdirən yeni layihədə aktiv iştirak edirlər. 2025-ci ilin sentyabrından start götürən və dekabrın ortalarına qədər davam edəcək layihə gənclərin biznes və sahibkarlıq bacarıqlarının inkişafına yönəlib.

Layihə “Mingəçevir Valideynlər Assosiasiyası” İctimai Birliyi və ADA Məktəbinin fizika müəllimi Həsən Hüseynlinin birgə təşəbbüsü ilə həyata keçirilir. Proqram çərçivəsində əsasən MDU tələbələrindən və iki məktəblidən ibarət olan 25 nəfərlik komandaya sahibkarlıq, startap, liderlik və sosial məsuliyyət mövzuları üzrə altı təlim keçirilir.

 İlk təlimlərdə gənclərlə startapdan uğura gedən yolda motivasiya və ideya formalaşdırılması, komanda işi və liderliyin sahibkarlıqdakı roluna, sosial sahibkarlıq, marketinq və Moldova təcrübəsi barədə barədə danışılıb.

Layihənin ən yaddaqalan hissəsi MDU tələbələrinin iştirakı ilə Mingəçevirin  girişində 120 çinarın əkilməsidir. Ərazi Mingəçevir Şəhər İcra Hakimiyyətinin təşəbbüsü və Yaşıllaşdırma və Təmizlik İdarəsinin dəstəyi ilə damcı suvarma sistemi ilə təchiz olunub.

“Mingəçevir Valideynlər Assosiasiyası” İctimai Birliyinin prezidenti Fərman Nəbiyev bildirib ki, bu təşəbbüs həm zəfərimizin 5 illik yubileyinə, həm də Mingəçevir şəhərinin 77 illiyinə həsr olunub:

 “MDU tələbələrinin fəal iştirakı ilə yeni yaşıllıq zonası salındı. Gəncədən gətirilən 120 çinar artıq Mingəçevirdən boylanır. Bu, gənclərin ətraf mühitə, həm də sosial təşəbbüslərə bağlılığının göstəricisidir”.