Atadan oğula, oğuldan nəvəyə... - Bu nəsil riyaziyyata niyə bu qədər bağlıdır?

Elm, bilik paylaşıldıqca daha da gözəlləşir, möhkəmlənir. Bu sözləri Saatlı rayonunda yaşayan, riyaziyyat elminə bağlılığı ilə seçilən Namazovlar nəslinə aid etmək olar. Maraqlıdır, bu nəsildə demək olar ki, hər bir şəxs riyaziyyata xüsusi maraq göstərir. Onların bir çoxu üçün isə bu maraq sadəcə həvəs deyil, həqiqi bir elm sevgisinə çevrilib.

“Azərbaycan müəllimi” həmin nəslin bir neçə nümayəndəsi ilə həmsöhbət olaraq onların uğur hekayəsini qələmə alıb.

Onlardan biri - Vüqar Namazov 2008-ci ildən riyaziyyat müəllimi kimi fəaliyyət göstərir. Hazırda Saatlı rayonu M. Əliyev adına Əlisoltanlı kənd tam orta ümumtəhsil məktəbində çalışır. Müəllimlərin diaqnostik qiymətləndirməsi (DQ) və sertifikasiya imtahanda mümkün 60 baldan 55-ni (ixtisas 100%) toplayıb.

Vüqar müəllim riyaziyyatı digər fənlərdən daha çox niyə sevdiyini və başqa uğurlarından həvəslə söz açır: “Riyaziyyatı bu qədər sevməyim ailəmdə, həm ata, həm də ana tərəfdən tanınmış riyaziyyatçıların olmasıdır. Əmim Şahin Namazov illərdir riyaziyyat sahəsində böyük uğurlara imza atıb. Təsadüfi deyil ki, əmim  saysız-hesabsız uğurlarına görə Prezident İlham Əliyev tərəfindən mükafatlandırılıb.

Əmim 2024-cü ildə 65 yaşında müəllimlərin sertifikasiya imtahanında könüllü iştirak edərək 60 baldan 58 bal toplayıb. Həmçinin bütün uğurlarımda pay sahibi olmuş anam illərdir ki, təhsil aldığım Saatlı rayon Gomuşçu kənd orta məktəbində riyaziyyat müəllimi və hazırda direktor müavini vəzifəsində çalışır. Mənim fəaliyyətimdə xalam qızı, riyaziyyat müəllimi Şəfəq Əliyevanın da böyük rolu olmuşdur. Böyük uğurlara imza atmış və vaxtsız vəfat etmiş Şəfəq müəllimin etdiklərinin bir hissəsini həyata keçirmək üçün hazırda əlimdən gələni edirəm.  Eləcə də ailəmizin riyaziyyat ənənəsini övladlarım Rəhman və Bəhman davam etdirir. Müxtəlif olimpiadalarda uğur qazanan övladlarımın ən böyük uğurlarından biri Bolqarıstanda təşkil olunan Beynəlxalq Sərhədsiz Riyaziyyat Olimpiadasında qızıl medalla ölkəmizə qayıtmaları idi”.

Vüqar müəllim qeyd edir ki, uğurları öz ixtisası ilə yekunlaşmır. İstər intellektual, istərsə də idman sahəsində respublika səviyyəsində böyük uğurlara imza atıb: "Bunlara nümunə olaraq intellektual yarışlarda 8 dəfə televiziya ekranlarında yayımlanan yarışların respublika çempionu və dəfələrlə finalçı olduğum üçün 2016-cı ildə Gənclər və İdman Nazirliyi tərəfindən "Ən yaxşı intellektual məşqçi"  mükafatını qazanmışam. 2015-ci ildə I Avropa Oyunlarının alov məşəlini Saatlı rayonunda alovlandıranlardan biri də mən olmuşam. 
2018-ci ildə təhsil nazirinin əmrinə əsasən təhsilin inkişafındakı xidmətlərimə və gənc nəslin təlim-tərbiyəsi sahəsində yüksək nailiyyətimə görə “Fəxri Fərman”la, 2019-cu ildə Prezident cənab İlham Əliyev tərəfindən “Tərəqqi” medalı ilə təltif olunmuşam.

2021-ci ildə AGMA-nın və Təhsil Nazirliyinin təşkil etdiyi “Gənc müəllimlər arasında futzal yarışı”nda həm baş məşqçi, həm də oyunçu kimi çempion olaraq, turnirin “Ən yaxşı oyunçu”  diplomu ilə təltif edilmişəm. Eləcə də 2021-ci ildə AGMA-nın və Təhsil Nazirliyinin təşkil etdiyi “Fərq yaradan müəllim” layihəsinin 3 mərhələsini keçərək qalib olmuşam. 2022-ci ildə "Türkiyə - Azərbaycan Öğrətmənlərinin I Eğitim Zirvəsi" proqramında iştirak edib və uğurla tamamladığım üçün “Sertifikat” əldə etmişəm. 2023-cü idəl Bolqarıstanda keçirilən “Beynəlxalq Sərhədsiz Riyaziyyat Olimpiadası”na hazırladığım şagirdlərim 1 kubok, 1 ulduz, 2 gümüş medal və 4 bürünc medalla geri dönüblər. Bu yaxınlarda isə elm və təhsil naziri Emin Əmrullayevin əmri ilə “Azərbaycan Respublikasının qabaqcıl təhsil işçisi” döş nişanı ilə təltif olunmuşam”.

"Bir neçə düstur üçün müəlliflik hüququ aldım"

Bu nəslin daha bir nümayəndəsi Vüqar Namazovun əmisi Şahin Namazovdur. Şahin müəllim də riyaziyyat elminə marağının necə yaranmasından bəhs edərkən, atasını və riyaziyyat müəllimini xatırlayır:
“Rəhmətlik atamın dəqiqlik xarakteri və riyaziyyat müəllimim Həsən Şəmilova olan sevgim mənim bu peşəni seçməyimə səbəb olub. 44 illik fəaliyyətim dövründə buraxılış siniflərimin ali məktəblərə qəbul faizi həmişə yüksək olub. Şagirdlərim riyaziyyat olimpiadalarında fəal iştirak ediblər. 2015-ci ildə BDU-nun Elmi Şurasına təqdim etdiyim elmi-metodik məqaləyə müsbət rəy verildi və bir neçə düstur üçün müəlliflik hüququ aldım. Daim öz üzərimdə çalışıram, yeniliklər axtarışındayam. 2017-ci ildə təhsil naziri tərəfindən “Azərbaycan Respublikasının qabaqcıl təhsil işçisi” döş nişanı ilə, 2018-ci ildə  Prezident İlham Əliyev tərəfindən "Tərəqqi" medalı ilə təltif olunmuşam”.

Şahin müəllim fənnini şagirdlərinə necə sevdirməsindən danışarkən, bildirir ki, müəllim şəxsiyyət etalonu olmalıdır:  “Tədris olunan hər bir mövzunun gündəlik həyatımızda əhəmiyyəti, tətbiqi sahələri şagirdlərə tam açıqlanmalıdır. Əyani vasitələrdən, yeni üsullardan istifadə etmək lazımdır. Dərslər şagirdyönümlü olmaqla, differensial təlimi tətbiq etmək lazımdır. Müəllim şagird üçün şəxsiyyət etalonu olmalıdır”.

"Atam kimi güclü riyaziyyatçı olmaq istəyirəm"

Nəslin riyaziyyat ənənəsini Vüqar müəllimin övladları – Rəhman və Bəhman uğurla davam etdirir.

Rəhman 8-ci sinifdə təhsil alır. Onun sözlərinə görə, ən böyük idealı atasıdır: “Atam kimi həm güclü riyaziyyatçı, həm intellektual yarışların qalibi olmaq, həm də idman sahələrində uğurlar əldə etmək istəyirəm. Riyaziyyatı sevmək səbəblərimdən biri atam kimi olmaqdır. Riyaziyyat olimpiadalarında dəfələrlə yüksək nəticələr göstərmişəm.  KINGS Beynəlxalq Olimpiadasında dəfələrlə mükafatçı olmuşam. Kenquru Beynəlxalq Riyaziyyat Məntiq Olimpiadasının finalçısı olmuşam. Mənim üçün ən böyük uğur Bolqarıstanda “Beynəlxalq Sərhədsiz Riyaziyyat Olimpiadası”nın respublika turunun qalibi olduqdan sonra bu ölkənin Nesebr şəhərində keçirilən final mərhələsində qalib olub, 38 ölkə arasında bayrağımızı yüksəklərə qaldırmağımız idi. Ən yadda qalan anım bu uğurumu qonşularımız olan ermənilərin həsrətlə izləməsi idi. Şahmat oynamağı çox sevirəm və dəfələrlə müxtəlif tədbirlərin qalibi olmuşam. Riyaziyyat sahəsində gələcək planlarım müxtəlif olimpiadalarda nəticə göstərmək və gələcək imtahanlarda maksimum nəticə əldə etməkdir"- deyə, o əlavə edir.

Bəhman isə 7-ci sinifdə oxuyur. O deyir ki, riyaziyyat fənnini sevməyi ilə yanaşı, bu fənni daha rahat öyrənə bilir:
"Belə desək az vaxt sərf etməklə, dərsdə müəllimin izahı bəs edir ki, dərsi mənimsəyə bilim. Mənim üçün fənlər arasında ən rahat mənimsənilən fənn riyaziyyatdır. Qardaşımla eyni hazırlşdığımız üçün əksər uğurlarımız və gələcək planlarımız,  demək olar ki, eynidir".

Beləliklə, riyaziyyatçılar nəsli – Namazovlar ailəsi – biliklərin nəsildən-nəslə ötürüldüyü, uğurların isə yalnız təcrübə ilə deyil, həm də sonsuz sevgi ilə qazanıldığı bir məktəbdir. Bu gün onlar sübut edirlər ki, riyaziyyat sadəcə bir fənn deyil, dəqiqlik, intizam və qələbə ruhunun daşıyıcısıdır.

Namazovlar nəsli bir daha göstərir ki, güclü ailə ənənəsi və bilik sevgisi mövcud olduğu yerdə, uğurun sərhədi yoxdur.