Şagirdləri ilə çiyin-çiyinə döyüşən müəllim

İsmayıllı rayon A.Məmmədov adına Diyallı kənd tam orta məktəbin çağırışaqədərki hazırlıq rəhbəri Altay Pənahov hərbçi olub. 17 il idi ki, orta məktəbdə çağırışaqədərki hərbi hazırlıq müəllimi idi. Hərbi hazırlıq keçdiyi şagirdlərinin nə vaxtsa mütləq müharibədən keçəcəyinə əmin idi, amma o gün gələndə şagirdləri ilə çiyin-çiyinə dura bilib-bilməyəcəyi düşüncələrinin beynini gəmirdiyi günlərdən birində gözlənilən müharibə başlayıb və onun özü üçün müharibə yolu görünüb: “Müharibə başlayanda  46 yaşım vardı, ehtiyatda olan zabit kimi iştirak edə bilərdim və etdim”.

Altay müəllim səngərdə həm həmkarlarına, həm şagirdinə rast gəlib: Şagirdlərimdən, ilkin hərbi hazırlıq keçdiyim uşaqlardan 36 nəfər Vətən müharibəsinə qatıldı. Hazırlıq keçdiyim uşaqlarla çiyin-çiyinə döyüşmək, hətta səngər yoldaşı olmaq qismət oldu. Amma bunun ürək titrədən yanı da vardı. Komandir üçün tabeçiliyində olan əsgərin, müəllim üçün şagirdinin şəhid olması çox ağırdır. Müharibə dövründə minaatan batareyanın komandiri olmuşam. Çalışdım ki, buraxdığım səhv ucbatından tabeliyimdə olan əsgərlərdən birinin də burnu qanamasın. Xoşbəxtəm ki, hamısı evlərinə sağ-salamat qayıtdılar. Amma müəllim kimi bu qədər şanslı ola bilmədim. Şagirdlərimdən 2 nəfəri - Orxan Lətifli, Tural Şıxızadə şəhid oldu. 3 nəfər yaralanmışdı, səhhətlərində problem olsa da, yaşayırlar. Bir şagirdim - Elnur Qədirli də kəndimizdə gözümüzün önündə böyüyən uşaqlardan idi, müharibədən qayıtmadı, itkin düşdü”.

Altay Pənahov deyir ki, xidmət etdiyi bölmə ilk gündən Suqovuşan istiqamətində gedən döyüşlərə qatıldığından axıra qədər məhz Talış-Suqovuşan istiqamətdə döyüşüb. Zəfər günü Tapqaraqoyunlu kəndi yaxınlığında olub: “Noyabrın 7, 8 və 9-da döyüş mövqeyindən geri çağrılmışdıq. Taborumuz Tapqaraqoyunlu kəndi yaxınlığında yerləşmişdi. Komplektləşdirilib başqa - cənub istiqamətində döyüşlərə yönləndiriləcəyimiz planlaşdırılırdı”.

Zəfər xəbəri bir anda gəlib: “Biz nisbətən geridə olsaq da, ön cəbhədə ordumuzun raket artilleriya həmləsi davam edirdi. Təsəvvür edin ki, gələn atəş səsləri, səmada uçuşan od, yer-göy müharibənin əlamətlərinə bürünmüşdü. Birdən-birə bütün səslər susdu, atəş dayandı. Gecə xəbər gəldi ki, Ali Baş Komandan çıxış edir, düşmən təslim olub. Hamımızın ayaqda olduğumuz bir vaxtda gəlmişdi xəbər. Onsuz da aramızda düşmənin təslim olacağına şübhə edən yox idi. Bilirdik ki, gec-tez ya düşməni tamamilə torpaqlarımızdan qovacağıq, ya da onlar təslim olub özü ərazimizi tərk edəcək. Qələbəmiz çox böyük bir uğur idi. Bu gün gözümdə daha da böyüyüb”.

Bu böyük qələbədən sonda 2020-ci ilin dekabrında ordudan növbəti dəfə tərxis olunub ehtiyata buraxılarkən o, artıq kapitan idi: “2021-ci ildə “Suqovuşanın azad olunmasına görə”, 2022-ci ildə isə “Vətən müharibəsi iştirakçısı” medalı ilə təltif olundum”.

Altay Pənahov elm və təhsil naziri Emin Əmrullayevin əmri ilə “Azərbaycan Respublikası qabaqcıl təhsil işçisi” döş nişanı ilə təltif edilib.