ADNSU-nun müəllimləri “Dünya keyfiyyət həftəsi - 2025” tədbirində iştirak ediblər

Azərbaycan Dövlət Neft və Sənaye Universitetinin (ADNSU) “Sənaye təhlükəsizliyi və əmək mühafizəsi” kafedrasının professor-müəllim heyəti “Dünya keyfiyyət həftəsi - 2025” tədbirində iştirak edib.

"Azərbaycan müəllimi" xəbər verir ki, tədbirdə “TCS” şirkətinin rəhbəri Anar Məlikov çıxış edərək bildirib ki, son dövrlərdə Azərbaycanda keyfiyyətin təminatı, keyfiyyətə nəzarət və avadanlıqların diaqnostikası sahələrində xeyli iş görülüb və nəticədə istehsal olunan məhsullar beynəlxalq keyfiyyət standartlarının tələblərinə cavab verir. O qeyd edib ki, bu kontekstdə ali texniki məktəblərdə “Keyfiyyətin təminatı və nəzarət” fənninin tədrisi günün tələbidir və ADNSU bu sahədə irəlidədir.

ADNSU-nun “Sənaye təhlükəsizliyi və əmək mühafizəsi” kafedrasının müdiri, professor Sakit Rəsulov çıxışında bildirib ki, bu ildən etibarən universitetin bütün texniki ixtisasları üzrə tələbələrə “Keyfiyyətin təminatı və nəzarət” fənni tədris olunur. Müvafiq fənn proqramı və dərslik hazırlanaraq tələbələrin ixtiyarına verilib. İmtahanda yüksək nəticə göstərmiş tələbələr beynəlxalq sertifikat əldə etmək üçün təqdim olunacaq.

Tədbir çərçivəsində keyfiyyətin idarə olunması və təminatı üzrə bilik yarışı da keçirilib. 100-dən çox iştirakçının qatıldığı yarışda “Sənaye təhlükəsizliyi və əmək mühafizəsi” kafedrasının müəllimləri Reyhanxanım Qəniyeva və Nigar Abdullayeva müvafiq olaraq birinci və üçüncü yerləri tutublar.