SAF-ın qaliblərinin sayı açıqlandı

SAF-ın qaliblərinin sayı açıqlandı

Bu il keçirilən STEAM Azərbaycan Festivalında (SAF) 150 iştirakçı I yer, 300 iştirakçı II yer, 350 iştirakçı III yeri tutub.

Bu barədə “Azərbaycan müəllimi”nə “STEAM Azərbaycan” layihəsindən məlumat verilib.

Final mərhələsində ümumilikdə 18 yarış kateqoriyası üzrə qiymətləndirmə aparılıb.

Qeyd edək ki, bu il artıq 5-ci dəfə təşkil olunan STEAM Azərbaycan Festivalı çərçivəsində 16 əsas və 2 alt kateqoriya üzrə yarışlar baş tutub. Festivalda Azərbaycanla birgə ümumilikdə 22 ölkə təmsil olunub.

Finalda 1409 nəfər iştirak edib. Festivala 19 xarici ölkədən 202 nəfər iştirakçı qatılmışdı. Festivalın əsas məqsədi STEAM əsaslı tədrisin təşviqi, təhsilalanlar arasında XXI əsr bacarıqlarının inkişaf etdirilməsi, yaradıcı gənclərin üzə çıxarılması, eləcə də innovativ layihə və həllərin hazırlanmasının dəstəklənməsidir.

Qeyd edək ki, STEAM beş əsas sahənin birgə və inteqrasiya olunmuş şəkildə tədrisini əhatə edən modeldir. Bu yanaşma elm (Science), texnologiya (Technology), mühəndislik (Engineering), incəsənət (Art) və riyaziyyatın (Math) birgə öyrədilməsi ideyası üzərində qurulub.