“Təhsil üçün əl-ələ” layihəsinin final tədbiri keçirilib

Noyabrın 18-də "Azərbaycan Böyük Britaniya Məzunları" İctimai Birliyinin  (AUKAA) təşkilatçılığı Azərbaycan Respublikası Elm və Təhsil Nazirliyinin, "Paşa Holdinq"in və Böyük Britaniya və Şimali İrlandiya Birləşmiş Krallığının ölkəmizdəki səfirliyinin dəstəyi ilə həyata keçirilən “Təhsil üçün əl-ələ” layihəsinin final tədbiri baş tutub.

"Azərbaycan müəllimi" xəbər verir ki, tədbirdə Elm və Təhsil Nazirliyinin şöbə müdiri Səbuhi Rzayev, Böyük Britaniya və Şimali İrlandiya Birləşmiş Krallığının ölkəmizdəki siyasi məsələlər üzrə şöbə rəhbəri və konsul Edvard Krimbl, Paşa Holdinqin rəsmi nümayəndəsi Bahar Məmmədova, Azərbaycanda yerləşən Britaniya Təhsil Şurasının direktoru Nərgiz Hacıyeva və digər qonaqlar iştirak edib.

Layihə çərçivəsində 10 müxtəlif rayon üzrə 10 kənd məktəbindən 500-ə yaxın 9-10-cu sinif şagirdləri ilə görüş keçirilib. Görüşlərdə müsabiqə yolu ilə 10 rayon üzrə seçilən 30 şagird Bakıda baş tutan düşərgədə iştirak edib.

Düşərgədə uşaqların ixtisaslarına uyğun universitetlər, müxtəlif qurumlar ziyarət olunub. Bununla yanaşı, uşaqların seçmək istədikləri peşələrə uyğun təlimçilərlə görüşlər keçirilib. Eyni zamanda, uşaqların mədəni istirahətləri üçün muzey və şəhər gəzintiləri təşkil olunub.

Tədbirdə Ağdam, Bərdə, Gədəbəy, Salyan, Siyəzən, Yardımlı, Lerik, Zaqatala, Balakən rayonlarından olan düşərgə iştirakçılarına Böyük Britaniya və Şimali İrlandiya Birləşmiş Krallığının ölkəmizdəki fövqəladə və səlahiyyətli səfiri Fergus Auldun imzası ilə sertifikatlar təqdim olunub.

Qeyd edək ki, "Təhsil üçün əl-ələ" layihəsi "Azərbaycan Böyük Britaniya Məzunları" İctimai Birliyinin 2016-cı ildən etibarən hər il könüllü əsaslarla icra etdiyi layihədir. Layihənin məqsədi şagirdlərə təhsilin önəmi, seçə biləcəkləri ixtisaslar, xaricdə təhsil imkanları, peşə təhsilinin əhəmiyyəti haqqında məlumat vermək, onları əmək bazarına hazırlamaqdır.