NDU-da “Suverenliyin Zəfər yolu” kitabının təqdimatı olub

Naxçıvan Dövlət Universitetində Hüquq və İnsan Haqları İnstitutu PHŞ-nin İdarə Heyətinin sədrinin müavini, hüquq üzrə fəlsəfə doktoru Vəfaddin İbayevin “Suverenliyin Zəfər yolu: reallaşan ideyalar, hüquqi əsaslar və siyasi paralellər” adlı kitabının təqdimatı keçirilib.

Universitetdən "Azərbaycan müəllimi"nə bildirilib ki, tədbiri giriş sözü ilə universitetin rektoru Elbrus İsayev açaraq kitabın elmi-nəzəri əhəmiyyətini və suverenlik mövzusunun hüquqi aspektlərdə sistemləşdirilməsinin aktuallığını vurğulayıb. Rektor qeyd edib ki, əsər müasir dövlətçilik proseslərini analitik müstəvidə təqdim edir, hüquq elminə yeni elmi yanaşmalar qazandırır və xüsusilə tələbələrin siyasi-hüquqi düşüncəsinin formalaşmasına mühüm töhfə verir. O həmçinin kitabda yer alan faktoloji materialların zənginliyini və mövzuların ardıcıllıqla izahını yüksək qiymətləndirərək onun tədris prosesində geniş istifadə imkanlarına toxunub.

Təqdimat zamanı bildirilib ki, kitabın əsas mövzusunu 44 Günlük Vətən Müharibəsi, həmin dövrdə baş verən proseslər və Azərbaycan Respublikasının Prezidenti İlham Əliyevin müharibə zamanı media vasitəsilə verdiyi bəyanatların təhlili təşkil edir. Nəşrdə Prezidentin çıxışlarının siyasi, hüquqi və informasiya aspektləri üzrə qiymətləndirilməsi, eləcə də müharibənin reallıqlarına dair faktoloji məlumatlar öz əksini tapır.

Hüquq və İnsan Haqları İnstitutu PHŞ-nin İdarə Heyətinin sədri Məhəmməd Quluzadə çıxışında kitabın suverenlik anlayışının hüquqi əsaslarının araşdırılmasına verdiyi elmi dəyəri xüsusi vurğulayıb. O qeyd edib ki, müəllif dövlətçilik konsepsiyasını tarixilik, hüquq normaları və siyasi qərarlar çərçivəsində təhlil edərək müasir hüquqi yanaşmalarla səsləşən dolğun elmi nəticələr ortaya qoyub. Məhəmməd Quluzadənin sözlərinə görə, bu kimi elmi nəşrlər hüquq sahəsində analitik mühitin genişlənməsinə mühüm töhfə verir və institutun tədqiqat istiqamətlərinə uyğunluğu ilə seçilir.

Naxçıvan Muxtar Respublikası Ali Məclisinin deputatı, universitetin Ümumi hüquq kafedrasının müəllimi Əziz Qasımov çıxış edərək kitabın siyasi tarix, hüquq və beynəlxalq münasibətlər kontekstində sistemli yanaşma təşkil etdiyini bildirib və əsərin elmi baxımdan yüksək dəyər daşıdığını qeyd edib.

Tələbə Elmi Cəmiyyətinin sədri Yusif Mirzəzadə isə kitabın tələbələr üçün əlçatan elmi resurs olduğunu, gənclərin siyasi və hüquqi maariflənməsində mühüm rol oynadığını vurğulayaraq müəllifə təşəkkürünü ifadə edib.

Sonda kitabın müəllifi Vəfaddin İbayev tədqiqatın məqsədi, yanaşma prinsipləri və bölmələrin hazırlanma prosesi barədə məlumat verərək tədbirin təşkilatçılarına və iştirakçılara təşəkkürünü bildirib.