"BilBacar" müsabiqəsinin “Yarış” mərhələsi davam edir

Elm və Təhsil Nazirliyi, Təhsil İnstitutu və Məktəbəqədər və Ümumi Təhsil üzrə Dövlət Agentliyinin birgə təşkilatçılığı ilə keçirilən “BilBacar” müsabiqəsinin dekabr ayı üzrə yarış mərhələsi həyata keçirilir.
"Azərbaycan müəllimi" xəbər verir ki, “Yarış” mərhələsi bu tədris ili üzrə ümumilikdə 4 dəfə olmaqla BilBacar koordinatorunun müşayiəti ilə keçirilir. Proses tamamlandıqdan sonra nəticələr respublika, regional təhsil idarəsi və məktəb üzrə elan edilir.
Müsabiqə cari tədris ilində 3 və 4-cü sinif şagirdlərini əhatə edir. Şagirdlər yarışda topladıqları ballara əsasən yer tutacaqlar və ən çox bal toplamış 450 şagird 2026-cı ilin iyun ayında final yarışında iştirak edəcək.
Qeyd edək ki, müsabiqənin builki məqsədi ibtidai sinif şagirdlərində oxu savadlılığını artırmaq, mətnin məzmununu anlama, təhlil və nəticə çıxarma bacarıqlarını inkişaf etdirmək, oxu fəaliyyətlərini təşviq etmək, eyni zamanda şagirdlərə kompüter əsaslı qiymətləndirmə mühitində təcrübə qazandırmaqdır.