Masallı məktəblərində “Startap və innovasiya” aylığı keçirilir

Masallı rayonunun ümumtəhsil məktəblərində “Startap və innovasiya” aylığı keçirilir.

“Azərbaycan müəllimi” Masallı rayonu üzrə təhsil sektoruna istinadən xəbər verir ki, “Startap və innovasiya” ayındakı fəaliyyətlər həftələr üzrə müəyyənləşdirilib.

2-8 fevral (1-ci həftə) “İdeyalar”, 9-15 fevral (2-ci həftə) “İdeyadan – startapa” həftəsi təşkil olunub. 16-22 fevral (3-cü həftə) “Komanda işi və liderlik”, 23-28 fevral (4-cü həftə) isə “Yarat” həftəsi təşkil olunacaq.

Layihənin əsas məqsədi şagirdləri fərqli və yaradıcı düşünməyə sövq etmək, onları real problemlərə innovativ həllər tapmağa istiqamətləndirməkdir. Təşəbbüs məktəblilərə sadəcə ideya irəli sürməyi deyil, həmin ideyanı formalaşdırmağı, əsaslandırmağı və təqdim etməyi də öyrətməyi hədəfləyir.

Masallı rayon Rafiq Əlihəsənov adına 1 nömrəli tam orta məktəbin coğrafiya müəllimi Aynur Ələkbərli bildirir ki, Masallı məktəblərində “Startap və innovasiya” aylığı çərçivəsində maarifləndirici guşələr hazırlanıb, divarlar innovativ ideyaları əks etdirən materiallarla bəzədilib: “Bu təşəbbüs şagirdlərdə yaradıcı düşünmə, problem həlletmə və innovativ yanaşma bacarıqlarının formalaşdırılmasına xidmət edir. Mənim bu layihədə 5 liqa mentorundan biriyəm. 20 məktəbdə bu fəaliyyətin həyata keçirilməsinə dəstək oluram. Həftəlik planlarımız var. Məktəblərə səfər edir, təlimlər keçirir, ideyaların qurulmasına istiqamət veririk. Bizim məktəbdən bu aylığa 3 müəllim, 13 komanda cəlb olunub. Səlahiyyətimdə olan digər məktəblər də çox maraqlı və innovativ ideyaları ilə fərqlənir”.

Aynur müəllim bir daha vurğulayır ki, layihələr həftələr üzrə mərhələli şəkildə təşkil olunur:

“İdeyalar” həftəsi - Bu mərhələdə şagirdlər ətraf mühitdə mövcud olan real problemləri müəyyənləşdirir, müxtəlif ideyalar irəli sürür və sərbəst ideya müzakirələri aparırlar. Məqsəd onların sərbəst düşüncə və analiz bacarıqlarını inkişaf etdirməkdir.

“İdeyadan–startapa” həftəsi - Artıq ideyalar dəqiqləşdirilir və biznes modelinə çevrilir. Şagirdlər bazar araşdırması aparır, ideyanın hansı real problemi necə həll edəcəyini müəyyənləşdirir, gəlirin necə əldə olunacağını və layihənin kimə lazım olduğunu araşdırırlar. Bu mərhələ onlara sahibkarlıq düşüncəsinin əsaslarını aşılamağa xidmət edir.

“Komanda işi və liderlik” həftəsi - Şagirdlər qruplara bölünərək birlikdə işləməyi öyrənir, əməkdaşlıq bacarıqları və liderlik keyfiyyətləri formalaşdırırlar. Bu mərhələdə komanda ruhu və məsuliyyət hissi ön plana çıxır.

“Yarat” həftəsi - Son mərhələdə ideyalar artıq gözlə görünən formaya salınır. Layihələr təqdimat, model və digər müxtəlif formalarda nümayiş etdirilir. Beləliklə, ideya konkret nəticəyə çevrilir”.

Müəllim qeyd edir ki, layihənin sonunda münsif qiymətləndirməsi aparılacaq. Komandalar aşağıdakı meyarlar üzrə dəyərləndiriləcək: “Layihələr ideyanın reallığı və gəlirli olmasına, SWOT təhlilinə, komandanın motivasiyasına, təqdimat bacarıqlarına, hazırlıq səviyyəsinə, ekoloji və sosial təsirlərinə, ideyanın innovativliyinə görə qiymətləndiriləcək”.

Mentorun sözlərinə görə, müəllimlərin rolu şagirdlərə istiqamət vermək, ideyaların daha aydın və sistemli formalaşmasına dəstək olmaq, həmçinin təqdimatların hazırlanmasında onlara kömək göstərməkdən ibarətdir:  “Ən vacib məsələlərdən biri isə uğurlu ideyaların davamlılığının təmin edilməsidir. Seçilmiş startap layihələri ölkəmizdə fəaliyyət göstərən dövlət və özəl proqramlar barədə məlumatlandırılacaq, onlara maddi və təlim xarakterli dəstək imkanları təqdim edən təşəbbüslərdə iştirak etmələri üçün məsləhətlər veriləcək”.

Beləliklə, “Startap və innovasiya” aylığı şagirdlərə yalnız ideya qurmağı deyil, onu reallığa çevirməyin yollarını da öyrədir. Bu təşəbbüs məktəblərdə yaradıcı düşüncə, sahibkarlıq ruhu və komanda mədəniyyətinin formalaşmasına mühüm töhfə verir.