Bu, ən gülməli və unudulmaz anlardan biri idi – 17 yaşlı könüllünün hekayəsi

Rövşən Məlikovun 17 yaşı var. Bakı Sənaye və İnnovasiyalar üzrə Bakı Dövlət Peşə Təhsil Mərkəzinin tələbəsidir. “İnformasiya texnologiyaları üzrə texniki dəstək mütəxəssisi” ixtisasında təhsil alan Rövşən peşə təhsilində artıq könüllülk fəaliyyəti ilə məşhurlaşanlardandır. Fəaliyyət tarixçəsi Bərdə şəhər Şəhid Alı adına 5 nömrəli tam orta məktəbdən məzun olandan sonra başlayıb: “Orta təhsilimi başa vurduqdan sonra “ASAN Könüllüləri” sıralarına qoşulmuşam. Könüllülük fəaliyyətimi Qızıl Aypara Cəmiyyətində uğurla davam etdirmişəm”.
Rövşən tələbə olmadan öncə könüllü olub: ““ASAN Könüllüləri” proqramını yüksək nəticələrlə başa vurduqdan sonra Bakı Sənaye və İnnovasiyalar üzrə Bakı Dövlət Peşə Təhsil Mərkəzinə qəbul olundum. Mərkəzin əməkdaşlıq etdiyi “Code Academy”də təhsil alıram”.

İndi də peşə təhsilində könüllü fəaliyyətini davam etdirir: “Hazırda “Peşə Könüllüsü” proqramında fəaliyyət göstərirəm və bu fəaliyyətdən böyük məmnunluq duyuram”.

Rövşən deyir ki, könüllü olmaq olduqca qürurverici hissdir: “Başqalarına kömək etdikcə özümü daha faydalı və dəyərli hiss edirəm”.
Artıq fəaliyyəti ilə bağlı çoxlu maraqlı xatirələri də var: “ASAN Xidmət Mərkəzində yenicə könüllü fəaliyyətinə başlamışdım. Hətta, yanlış xatırlamıramsa, ilk günüm idi. Vətəndaşlardan sorğu almalıydım. Əvvəlcədən təlim keçmiş könüllülər bunu necə edəcəyimi mənə göstərdilər. Tapşırıq sadə idi, vətəndaşlara sorğu verəcəkdim ki, mərkəzin xidmətindən razı qalıblarmı? Qapıda dayanıb çıxmağa hazırlaşan hər kəsə yaxınlaşaraq bunu soruşmalıydım. Vətəndaş məmnuniyyətinin ölçülməsinə mərkəzin direktorundan başladım. Mərkəzin direktorunu tanımırdım, ona yaxınlaşaraq “Salam xanım, xidmətdən razı qaldınızmı?” deyə soruşdum. Sualıma cavab verməyib sadəcə gülümsədi. “Köhnə” könüllülər gülərək mənə yaxınlaşdığım vətəndaşın mərkəzin direktoru olduğunu bildirdilər. Bu hadisə mənim könüllülük fəaliyyətimdə ən gülməli və unudulmaz anlardan biri oldu”.

Rövşən danışır ki, könüllü olmaq onun üçün təkcə fəaliyyət deyil, həm də qürurverici bir təcrübədir. Başqalarına kömək etdikcə özünü daha faydalı və dəyərli hiss edir, yeni dostlar qazanır və ünsiyyət bacarıqlarını inkişaf etdirir: “Könüllülük mənim üçün həm həyat məktəbi, həm də cəmiyyətə faydalı olmağın bir yoludur. Fəaliyyətimdə ən böyük məqsədim çox fəal olmaq və dəyərləndirilmək, eyni zamanda gələcəkdə məsul şəxs kimi fəaliyyət göstərməkdir”.