Bərdə peşə mərkəzində qısamüddətli təlimlərin məzunları təltif edilib

Dekabrın 10-da Bərdə Dövlət Peşə Təhsil Mərkəzində “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində həyata keçirilən qısamüddətli təlim məzunlarının təltif mərasimi baş tutub.

Peşə Təhsili üzrə Dövlət Agentliyindən "Azərbaycan müəllimi"nə bildirilib ki, tədbir zamanı aqronom/texnik, baytar köməkçisi, bağban-dekorator, geniş profilli traktorçu-maşinist, təmirçi-çilingər, kənd təsərrüfatı maşın və avadanlıqları üzrə çilingər, tornaçı, frezerçi və rəqəmli idarə olunan dəzgahların kompüter operatoru ixtisasları üzrə təlimləri uğurla bitirən 95 nəfər müdavimə dövlət nümunəli sertifikatlar təqdim edilib. Bu sertifikatlar məzunlara müvafiq ixtisaslar üzrə əmək fəaliyyətinə başlamaq və peşəkar fəaliyyət göstərmək imkanı yaradır.

Dövlət Proqramı çərçivəsində Bərdə Dövlət Peşə Təhsil Mərkəzində bu günədək 18 ixtisas üzrə 301 nəfər məcburi köçkün qısamüddətli təlimlərdə iştirak edərək əmək bazarında rəqabət qabiliyyətlərini artıracaq yeni bilik və bacarıqlar əldə edib.

Qısamüddətli təlimlərin müddəti seçilən ixtisasdan asılı olaraq 1 aydan 3 ayadək davam edir. Təlimlərin əsas məqsədi işğaldan azad edilmiş ərazilərə qayıdan əhalinin məşğulluq imkanlarını genişləndirmək, onların peşə vərdişlərini inkişaf etdirmək və davamlı məşğulluğunu təmin etməkdir.

Qeyd edək ki, Dövlət Proqramı çərçivəsində həyata keçirilən qısamüddətli təlimlər ölkə üzrə 12 peşə təhsil müəssisəsində 42 ixtisas üzrə icra olunur. Cari il ərzində Peşə Təhsili üzrə Dövlət Agentliyi və Dövlət Proqramı çərçivəsində müəyyən edilmiş digər qurumlar tərəfindən ümumilikdə 5658 nəfər qısamüddətli, 2082 nəfər isə ixtisasartırma təlimlərində iştirak edib.