Fransada azyaşlıların sosial şəbəkələrə girişi qadağan edilə bilər

Fransada 15-16 yaşa qədər uşaqların sosial şəbəkələrə girişinin qadağan edilməsi ilə bağlı qanun layihəsi yaxın aylarda Milli Assambleyada müzakirəyə çıxarıla bilər.

“Azərbaycan müəllimi” xarici KİV-ə istinadən xəbər verir ki, Fransa Prezidenti Emmanuel Makron yeniyetmələrin psixoloji təhlükəsizliyi ilə bağlı statistika və artan risklər fonunda sərt tədbirlərin görülməsinin vacib olduğunu bildirərək bu təşəbbüsü irəli sürüb.

Qadağa təşəbbüsü sosial şəbəkələrin yeniyetmələrin psixikasına təsiri ətrafında gedən geniş ictimai müzakirələr fonunda daha da aktuallaşıb. Bu məsələ xüsusilə 15 yaşlı fransalı məktəblinin intiharından sonra gündəmə gəlib. Onun anası sosial şəbəkələrin alqoritmlərinin oğlunu “uçuruma” apardığını iddia edərək "TikTok" və "Meta" kimi nəhəng platformalara qarşı hüquqi mübarizə başladıb.

Ana həmçinin oğlunun "WhatsApp"da kiberzorakılığa məruz qaldığını bildirib.

Makron valideynlərlə görüşündə deyib ki, parlament artıq yanvar ayında uşaqlar üçün sosial şəbəkə qadağasını müzakirə edə bilər: “Ekranlara nəzarəti geri almağın vaxtıdır”, – deyə o bildirib.

Fransa bu addımla Avstraliyanın bu həftə tətbiq etdiyi 16 yaşadək şəxslər üçün sosial şəbəkə qadağasına bənzər sərtləşdirilmiş qlobal tendensiyaya qoşulmuş olacaq.

Qanun layihəsinin müzakirələri ilin əvvəlində davam etdiriləcək.