Şirvan məktəblilərinin badminton idman növünə marağı artırılır

“Məktəbdə Badminton Hərəkatı” adlı qrant layihəsi çərçivəsində Şirvan şəhər Tahir Bağırov adına 11 nömrəli tam orta ümumtəhsil məktəbində layihənin açılış mərasimi baş tutub.

"Azərbaycan müəllimi" xəbər verir ki, açılış mərasimində bildirilib ki, layihənin əsas məqsədi məktəblilərin fiziki aktivliyinin artırılması, sağlam həyat tərzinin təşviqi və badminton idman növünə marağın formalaşdırılmasıdır.

Belə ki, layihə çərçivəsində 6–10-cu siniflərdən ümumilikdə 40 şagird seçilərək 5 ay müddətində xüsusi təlim proqramına cəlb olunacaq. Təlimlər həftədə 2 dəfə olmaqla ümumilikdə 48 saat təşkil edəcək. Proqram zamanı şagirdlər badminton idman növünün əsas texniki və taktiki bacarıqlarını mənimsəyəcək, fiziki hazırlıq səviyyələrini yüksəldəcək və komanda ruhu, nizam-intizam kimi vacib sosial bacarıqlar əldə edəcəklər.

Təlimlər müasir pedaqoji yanaşmalara əsaslanaraq interaktiv formada keçiriləcək, şagirdlərin fərdi inkişafı və idmana davamlı marağının formalaşdırılması diqqət mərkəzində saxlanılacaq. Layihə məktəb mühitində idmanın təşviqi ilə yanaşı, şagirdlərin asudə vaxtının səmərəli təşkili baxımından da mühüm əhəmiyyət daşıyır.

Qeyd edək ki, “Məktəbdə Badminton Hərəkatı” layihəsinin rəhbəri Şirvan şəhər Kimya-biologiya təmayüllü liseydə çalışan fiziki tərbiyə müəllimi Nurəddin Babayevdir. Layihənin əsas məqsədi məktəblərdə badminton idman növünün inkişafına töhfə vermək, şagirdlərin fiziki və psixoloji sağlamlığını gücləndirmək, eyni zamanda məktəblər arasında idman mədəniyyətinin formalaşdırılmasına dəstək olmaqdır.