Biləsuvar Təhsil Kompleksində Konfutsi İnstitutunun filialı yaradılacaq

 

Azərbaycan Dillər Universitetinin (ADU) nəzdində fəaliyyət göstərən Konfutsi İnstitutunun filialı Mübariz İbrahimov adına Biləsuvar Təhsil Kompleksində yaradılacaq.

"Azərbaycan müəllimi" xəbər verir ki, bununla bağlı Biləsuvar Təhsil Kompleksində görüş keçirib.

Görüşdə Təhsil Kompleksinin icraçı direktoru Aqşin Bağırov və Konfutsi Mərkəzinin rəhbəri Li Jihua iştirak edib, filialın yaradılmasının bölgədə təhsilin keyfiyyətinin yüksəldilməsinə, şagird və gənclərin Çin dili və mədəniyyətinə marağının artırılmasına, eləcə də beynəlxalq təhsil əlaqələrinin inkişafına mühüm töhfə verəcəyi vurğulanıb. Qeyd edilib ki, filialın fəaliyyəti çərçivəsində Çin dilinin tədrisi, mədəniyyət proqramları, müəllim və şagird mübadiləsi, müxtəlif elmi-mədəni tədbirlərin təşkili nəzərdə tutulur.

Həmçinin Konfutsi Mərkəzinin rəhbəri Li Jihua rayona səfəri çərçivəsində Biləsuvar Rayon İcra Hakimiyyətinin başçısı Faiq Qürbətov tərəfindən qəbul edilib.

Görüşdə təhsil və mədəni əməkdaşlığının genişləndirilməsi istiqamətində növbəti mühüm addımın atıldığı qeyd olunub.