Bərdə Peşə Mərkəzinin STEAM komandaları respublika turnirində uğurla çıxış ediblər

Fevralın 7-də Elm və Təhsil Nazirliyi və Gənclər və İdman Nazirliyinin dəstəyi, “STEAM Azərbaycan” layihəsinin təşkilatçılığı ilə keçirilən “VEX V5 Robotics Competition” Azərbaycan turnirində Bərdə Dövlət Peşə Təhsil Mərkəzinin STEAM komandaları uğurla iştirak ediblər.

"Azərbaycan müəllimi" xəbər verir ki, turnirdə mərkəzin “RoboTeam” və “Peşəkarlar” adlı komandaları robototexnika, proqramlaşdırma və mühəndislik sahələrində bilik və bacarıqlarını nümayiş etdirərək yüksək səviyyəli rəqabətli çıxışlar ediblər. Turnirin yekununda komandalar müxtəlif nominasiyalar üzrə fərqlənərək kuboklara layiq görülüblər.

Qeyd edək ki, “VEX V5 Robotics Competition” şagird və tələbələrin STEAM (elm, texnologiya, mühəndislik, incəsənət və riyaziyyat) bacarıqlarının inkişaf etdirilməsi, komanda işi, innovativ düşüncə və problem həll etmə vərdişlərinin formalaşdırılması baxımından mühüm əhəmiyyət daşıyır.