ARTİ və ADPU arasında Əməkdaşlıq Memorandumu imzalanıb

Fevralın 23-də Azərbaycan Respublikasının Təhsil İnstitutunda (ARTİ) Azərbaycan Dövlət Pedaqoji Universitetinin (ADPU) rəhbər heyəti ilə görüş keçirilib.

"Azərbaycan müəllimi" xəbər verir ki, ARTİ-nin direktoru vəzifəsini müvəqqəti icra edən Elnur Əliyev və ADPU-nun rektoru professor Cəfər Cəfərovun rəhbərlik etdiyi nümayəndə heyətləri iki qurum arasında əməkdaşlıq perspektivlərini müzakirə ediblər. Müzakirə əsnasında magistrantlar üçün dissertasiya mövzularının müəyyənləşdirilməsi, magistr tədqiqatlarının nəticələrinin paylaşılması və bu nəticələrin müvafiq sahələrdə tətbiq edilməsi, təhsil pillələri arasında müvafiq keçidlərin təkmilləşdirilməsi, biliyin ölçülməsində dünya təcrübəsi, pedaqogika sahəsində ixtisaslaşmalar üzrə müasir məzmunun tətbiqi və təhsil proqramlarının yenilənməsi, universitetin müxtəlif regionlardakı filiallarının insan resurslarının və maddi-texniki bazasının ortaq tədqiqatlarda istifadəsi və digər mövzulara toxunulub.

Görüşün sonunda ARTİ və ADPU arasında Memorandum imzalanıb. Sənədi imzalayan Elnur Əliyev və Cəfər Cəfərov gələcək əməkdaşlığa böyük ümid bəslədiklərini və bu əməkdaşlığın hər iki qurumun fəaliyyətinə müsbət təsir edəcəyinə inandıqlarını vurğulayıblar.