Ötən il 3 ali təhsil müəssisəsində təkrar proqram akkreditasiyası aparılıb

Təhsildə Keyfiyyət Təminatı Agentliyi (TKTA) 2025-ci il üzrə illik hesabatında müəllim hazırlığı istiqamətində həyata keçirilən proqram akkreditasiyası prosesinin nəticələrini açıqlayıb.

“Azərbaycan müəllimi” xəbər verir ki, agentlik tərəfindən məktəbəqədər təhsil istiqaməti üzrə (bakalavriat və magistratura səviyyələri nəzərə alınmaqla) 14 ali təhsil müəssisəsində  – Azərbaycan Dövlət Pedaqoji Universiteti (ADPU) və onun Cəlilabad, Ağcabədi, Quba, Şəki və Şamaxı filialları, Mingəçevir Dövlət Universiteti (MDU), Lənkəran Dövlət Universiteti (LDU), Naxçıvan Müəllimlər İnstitutu (NMİ), Sumqayıt Dövlət Universiteti (SDU), Azərbaycan Dillər Universiteti (ADU), Azərbaycan Qızlar Universiteti, Bakı Slavyan Universiteti (BSU) və Odlar Yurdu Universitenində sahə baxışları həyata keçirilib.

Eyni zamanda, “İbtidai sinif müəllimliyi” ixtisası üzrə 3 ali təhsil müəssisəsində təkrar proqram akkreditasiyası aparılıb. Bu proses Naxçıvan Müəllimlər İnstitutu, Gəncə Dövlət Universiteti və Azərbaycan Dövlət Pedaqoji Universitetinin Şamaxı filialını əhatə edib.

Qiymətləndirmə prosesində proqramların tətbiq mexanizmləri, tədris nəticələri və davamlı təkmilləşdirmə tədbirləri üzrə mövcud vəziyyət araşdırılıb.