Məktəblərə paylanan kompüterlərin sayı artıb

“Ölkədə təhsilin rəqəmsallaşdırılması istiqamətində həyata keçirilən tədbirlər çərçivəsində ümumi təhsil müəssisələrinin İKT avadanlıqları ilə təchizatı mərhələli şəkildə gücləndirilir”.

“Azərbaycan müəllimi” xəbər verir ki, bunu Elm və Təhsil Nazirliyinin Təhsil Sisteminin İnformasiyalaşdırılması İdarəsinin rəisi Vüsal Xanlarov “Təhsilin rəqəmsallaşması” mövzusunda keçirilən brifinqdə deyib.

O bildirib ki, 2018-ci ildə ümumi təhsil müəssisələrinə 20 900 kompüter paylanılıb. Bu göstərici 2019-cu ildə 21 150, 2020-ci ildə 36 934, 2021-ci ildə 57 008, 2022-ci ildə 100 508, 2023-cü ildə 145 508, 2024-cü ildə 189 085, 2025-ci ildə isə 236 295-ə çatdırılıb.
Kompüter təminatının artırılması nəticəsində şagird-kompüter nisbətində də müsbət dinamika müşahidə olunur. Belə ki, 2018-ci ildə bu nisbət 1:32 olduğu halda, 2024-cü ildə 1:9-a, 2025-ci ildə isə 1:7-yə enib.

V.Xanlarov əlavə edib ki, 2026-cı ilin sonunadək kompüter və şagird nisbətinin 1:6-ya çatdırılması planlaşdırılır.