Alim: “Bütün uğurların və uğursuzluqların təməli gənclikdə qoyulur"

"Gənclik bütün cəmiyyətlərin hərəkətverici qüvvəsidir. Gəncliyinə sahib olan dövlət hər zaman uğurlar qazanıb".

Bunu "Azərbaycan müəllimi"nə müsahibəsində Türkiyədə çalışan azərbaycanı alim Abdulla Sofiyev deyib.

O bildirib ki, Azərbaycan dövləti gənclərin inkişafına yönəlik çoxlu dövlət proqramları hazırlayıb, buna da ancaq sevinməliyik:

"Dinimiz də söyləyir ki, elm Çində olsa belə, onun dalınca getməlisən. Bütün uğurların və uğursuzluqların təməli gənclikdə qoyulur. Gənclərin uğura aparan yolu müxtəlif mərhələlərdən ibarətdir, onların formalaşması üçün ən yaxşı dövr orta məktəb, yetişməsi üçün ən yaxşı dövr isə universitet illəridir. Gənclərimiz bir sahədə özlərini mükəmməl inkişaf etdirmək üçün dünyanın ən yaxşı universitetlərindən birini uğurla, yüksək müvəffəqiyyətlə bitirməlidirlər. Əgər gənc bu vaxtı qaçırıbsa, öz ixtisasını və ya doktoranturasını dünyaşöhrətli alimin yanında (bəlkə də öz ölkəsində) və ya dünyanın aparıcı elmi mərkəzlərindən birində keçməlidir. Əgər bu vaxtı da qaçırıblarsa, dünyanın ən yaxşı elmi mərkəzlərindən birində postdoktorluq işləri görməlidirlər.

Bunlar tədqiqatçıda fərqli baxış yaradır. Bu kateqoriyalarda uğur qazanmaq asan deyil, lakin çox uğurlu olmaq insanı milyonlarla insandan fərqləndirir. Bu elmi sərmayə ona özünü və yaşıdlarını işlədiyi elm deyilən binada yerləşdirməyə və özünü onlarla müqayisə etməyə imkan verir".

Abdulla Sofiyev gənclər üçün bir sıra tövsiyələr də verib:

"15-25 yaşlarda keçirdiyin boş zaman, 40-50 yaşlarında belinə yük olacaq.

30 yaşına qədər bunun fərqində olmasan, 50-60 yaşında daha ağır yük daşımalı olacaqsan.

Təkamülünü 35 yaşa qədər tamamla, yoxsa ömrünün sonuna qədər əziyyət çəkəcəksən".