“Arzum süni intellekti ən yaxşı öyrədə bilən universitetdə təhsil almaqdır” - Olimpiadaçıların hədəfləri

Respublika fənn olimpiadalarının rayon (şəhər) turunda maksimal nəticələri ilə fərqlənənlər arasında Abşeron-Xızı Regional Təhsil İdarəsinin tabeliyindəki məktəblərin 19 şagirdi də var. 

“Azərbaycan müəllimi” həmin şagirdlərin bir necəsi ilə həmsöhbət olub. 

Nihad Qurbanov Sumqayıt şəhəri 26 nömrəli tam orta məktəbin 9-cu sinf şagirdidir: “İnformatika fənni üzrə iştirak etdiyim olimpidada maksimum bal topladığıma çox sevinirəm. Olimpiadaya kompüterdə çoxlu məsələlər həll edərək hazırlaşırdım. Ən sevdiyim fənn informatikadır. Gələcək hədəfim bu sahə üzrə inkişaf edərək xarici ölkələrdə biliyimi təkmilləşdirməkdir. Bundan əlavə, “Sabahın alimləri” layihəsində də iştirak edirəm. Bu layihədə məktəbimizin müəllimi Xatirə Babayeva mənə dəstək olur”.

Olimpidaya informatika fənni üzrə qatılan Məhəmmədəli Əhmədov Sumqayıt şəhəri 23 nömrəli tam orta məktəbin 10-cu sinfində oxuyur: “2024-cü ildə Moldovada keçirilən Avropa Gənclər İnformatika Olimpiadasında, Bolqarıstanda təşkil olunan Beynəlxalq Payız İnformatika Turnirində iştirak edərək bürünc medal qazanmışam. 2023-2024-cü tədris ilində keçirilmiş Respublika fənn olimpiadasında qızıl medala layiq görülmüşəm. 2022-2023-cü tədris ilində “Azercell CUP” müsabiqəsinin gümüş medalçısı olmuşam. İnformatika, fiziki tərbiyə, biologiya fənlərini çox sevirəm. Sinif yoldaşlarım və digər yoldaşlarımla birlikdə beynəlxalq olimpiadalar üçün nəzərdə tutulan məsələləri həll edirik. Digər tərəfdən, onlayn informatika yarışlarında iştirak edərək təcrübəmi və biliyimi artırmağa çalışıram. Arzum süni intellekti ən yaxşı öyrədə bilən universitetdə təhsil almaq və  biliyimi müxtəlif sahələrdə tətbiq etməkdir”.

Fikrət Əsədzadə Sumqayıt şəhəri 23 nömrəli tam orta məktəbin 10-cu sinfində təhsil alır: “Əldə etdiyim uğurlar proqramlaşdırma və kompüter elminə olan marağımın göstəricisidir. 2021-2022-ci tədris ilində Respublika fənn müsabiqəsində informatika fənni üzrə gümüş medal, 2022-2023 və 2023-2024-cü tədris illərində Respublika informatika olimpiadalarının gümüş medalçısı olmuşam. Bundan əlavə, 2021-2022-ci tədris ilində “Azercell CUP” müsabiqəsində gümüş medala layiq görülmüşəm. 2024-cü ildə Beynəlxalq Payız İnformatika Turniri (IATI) kimi nüfuzlu olimpiadada iştirak etmişəm. Bu uğurlar mənə biliklərimi daha çox artırmağıma motivasiya verir. Əlavə olaraq, 2022-2023 tədris ilində Respublika fənn müsabiqəsində fizika fənni üzrə bürünc medal qazanmışam. Olimpiadaçı dostlarımla məsələlər etməklə, onlayn yarışlara qatılmaqla təcrübəmi artırmağa çalışıram. Ən çox sevdiyim fənlər riyaziyyat, ingilis dili və informatikadır. Bu sahələrə olan marağım həm olimpiadalarda iştirak etməyimə səbəb olur, həm də gələcək hədəflərimi daha düzgün müəyyən etməyimə yardım göstərir. Hədəflərim olimpiada qalibliyini qoruyub saxlamaq,  beynəlxalq olimpiadada uğurlu nəticələr əldə etməkdir. Yüksək təhsil almış peşəkar mütəxəssis kimi yetişərək vətənimizə ləyaqətlə xidmət etmək hədəflərimin sırasındadır”.

Sumqayıt şəhəri 23 nömrəli tam orta məktəbin 10-cu sinfində oxuyan Nəsir Bəşirov da informatika üzrə maksimal bal toplayanların sırasındadır: “Respublika fənn müsabiqə və olimpiadalarında 6-cı sinifdən iştirak etməyə başlamışam. 6-ci sinifdə Respublika fənn müsabiqəsində informatika fənni üzrə və “Azercell CUP” müsabiqəsində bürünc medal, 7-ci sinifdə Respublika fənn müsabiqəsində fizika fənni üzrə qızıl medal, 8-ci sinifdə Respublika fənn olimpiadasında informatika fənni üzrə gümüş medal, “Azercell CUP” müsabiqəsində qızıl medal, 9-cu sinifdə Respublika fənn olimpiadasında qızıl medal qazanmışam. Beynəlxalq müsabiqə və olimpiadalarda da biliyimi sınamışam. “Info(1)CUP” beynəlxalq proqramlaşdırma müsabiqələrində bürünc medal, həvəsləndirici mükafat qazanmışam. Olimpiadada maksimum nəticə - 400 bal toplasam da, bilirəm ki, qarşıda daha çətin və məsuliyyətli mərhələlər var. Daha çox çalışmaq lazımdır.

Vaxtımın çoxunu olimpiada hazırlığına ayırıram. Müxtəlif beynəlxalq və yerli olimpiada, müsabiqələrdə istifadə olunan materiallar üzərində işləyirəm. Eyni zamanda, bu sahəyə marağı olan dostlarımla birlikdə çalışır, bir-birimizə dəstək oluruq. Sevdiyim fənlər informatika, ingilis dilidir”.

Tuncay Əmiraslanlı da Sumqayıt şəhəri 23 nömrəli tam orta məktəbin 10-cu sinif şagirdidir: 

“İndiyə qədər bir çox müsabiqə və olimpiadalarda iştirak etmişəm. Fizika fənni üzrə 7-ci sinifdə Respublika fənn müsabiqəsində, 8-ci və 9-cu siniflərdə Respublika fənn olimpiadalarında ardıcıl olaraq 3 qızıl medal qazanmışam. Eyni zamanda, Naqif Nəbiyev adına fizika müsabiqəsində gümüş medalla təltif olunmuşam. Respublika astronomiya olimpiadalarında 1 həvəsləndirici mükafat və 1 qızıl medal əldə etmişəm. 9-cu sinif üzrə buraxılış imtahanında 300 bal toplayaraq maksimum nəticə göstərmişəm. Fizika üzrə Respublika fənn olimpiadasının rayon (şəhər) mərhələsində yüksək nəticə göstərməyim məni çox sevindirir və gələcək mərhələlərdə uğur qazanmağıma motivasiya verir. Olimpiadalara hazırlaşmaq ciddi vaxt, səbir və diqqət tələb edir. Hazırlıq prosesində xarici elmi kitablar və məqalələrdən geniş istifadə edirəm. Ən sevdiyim fənlər fizika və riyaziyyatdır. Gələcək hədəfim beynəlxalq olimpiadalarda ölkəmi təmsil edərək uğur qazanmaq və ixtisasım üzrə özümü inkişaf etdirməkdir”.