""Masaüstü intellektual oyunun köməyilə Qarabağ tarixinin interaktiv öyrədilməsi" layihəsinin yarışı və bağlanış mərasimi keçirilib

""Masaüstü intellektual oyunun köməyilə Qarabağ tarixinin interaktiv öyrədilməsi" layihəsinin yarışı və bağlanış mərasimi keçirilib.

Təhsildə İnkişaf və İnnovasiyalar üzrə VIII qrant müsabiqəsində qalib gəlmiş bu layihənin yarış və bağlanışında Tovuz şəhər M.Ələkbərov adına tam orta məktəbin direktoru Sadiq Rəhimov,  müəllimlər  və şagirdlər iştirak edib.

Məktəblərarası Masaüstü intelektual oyunun köməyi ilə Qarabağ tarixinin öyrədilməsi məqsədi ilə təşkil olunan yarışmada Müşfiq Əliyev adına tam orta məktəb komandası, Mahir Ələkbərov adına fizika riyaziyyat və informatika təmayüllü lisey komandası və 1-ci yerin qalibləri Q.Rzayev adına Hacallı kənd tam orta məktəbinin "Dəmir Yumruq" komandası iştirak edib. İştirakçılar sonda sertifikatla təltif ediliblər.

Layihə çərçivəsində "Bilgə Qarabağ" adlı intellektual oyun vasitəsilə Qarabağın tarixi, mədəniyyəti və incəsənətinin interaktiv şəkildə öyrədilməsi planlaşdırılmışdır. İlkin mərhələdə, Türkiyə və Azərbaycandan 4 nəfərlik ekspert qrupu formalaşdırılıb və oyunun məzmunu hazırlanmışdır. Təlimat videosu çəkilib yayımlandıqdan sonra oyunlar çap edilib Azərbaycana gətirilmişdir. Daha sonra rəsmi şəxslər və digər qonaqların iştirakı ilə təqdimat mərasimi keçirilib və oyunun məktəblərdə istifadəsi ilə bağlı təlimlər verilmişdir.

Xatırladırıq ki, layihənin məqsədi Qarabağın tarixini, mədəniyyətini və incəsənətini məktəblilər arasında təbliğ etmək və onların bu mövzuda biliklərini zənginləşdirməkdir. Layihə çərçivəsində şagirdlərin Qarabağ mədəniyyəti ilə tanış olması və məktəbdaxili zəka müsabiqələrində iştirak etməsi nəzərdə tutulmuşdur.