İstedadını incəsənətlə göstərənlər - Qalib şagirdlərlə söhbət

İstedadını incəsənətlə göstərənlər - Qalib şagirdlərlə söhbət

Məlum olduğu kimi, martın 1-dən ölkəmizdə növbəti “Uşaq İncəsənət Festivalı-2025”in keçirilməsi ilə əlaqədar iştirakçıların qeydiyyatına start verilib. Mədəniyyət Nazirliyi, Elm və Təhsil Nazirliyi, Heydər Əliyev Mərkəzinin birgə təşkilatçılığı ilə keçirilən festivalda Azərbaycanın müxtəlif bölgələrindən yaradıcılıq bacarıqlarına güvənən, 6-17 yaş aralığında olan bütün uşaqlar peşəkar və həvəskar kateqoriyalar üzrə iştirak edə bilərlər. Festival istedadlı uşaqları kəşf etmək, onların yaradıcılığını üzə çıxarmaq, milli mədəniyyətə olan sevgini gücləndirərək, zəngin mədəni irsimizi gələcək nəslə ötürmək məqsədilə təşkil olunur.

“Azərbaycan müəllimi” “Uşaq İncəsənət Festivalı-2024”ün qalibləri ilə tanış olub, onların yeni iştirakçılara tövsiyələrini dinləyib. 

“Festival gənc istedadlar üçün əsl sınaq meydanıdır”

Tofiq İsmayılov adına 6 nömrəli tam orta məktəb-liseyin və Tofiq Quliyev adına 12 nömrəli onbirillik musiqi məktəbinin XI sinif şagirdi Ərtoğrul Balayev 2008-ci ildə Bakı şəhərində anadan olub. Musiqiyə olan marağının ailəsindən irəli gəldiyini qeyd edən Ərtoğrulun sözlərinə görə, nail olduğu bütün uğurlarında, bu sahədə əldə etdiyi bilik və bacarıqlarda müəllimlərinin rolu müstəsnadır: “Təhsil aldığım musiqi məktəbində müəllimim Yelena Xalilulinanın üzərimdəki əməyi danılmazdır. Musiqiyə olan dərin sevgisi, şagirdlərinə olan diqqət və qayğısı onun yüksək səviyyəli bir pedaqoq olduğunu sübut edir. Yelena xanım mənə təkcə musiqinin incəliklərini deyil, həm də əsərlərin dərinliklərinə nüfuz etmək bacarığını aşılayır, səhnə mədəniyyətini hərtərəfli öyrədir. Ailə üzvlərim klassik musiqiyə böyük önəm verirdilər və bunun nəticəsidir ki, artıq mən də uşaq yaşlarımdan bu sahəyə maraq göstərməyə başlamışdım.Məktəbə gedərkən əvvəlcə digər elm sahələrinə marağım olsa da, sonralar musiqinin gücü məni öz sehrinə saldı. Zənnimcə, bu qərarım həyatımın ən önəmli dönüm nöqtələrindən biri oldu. Qatıldığım respublika və beynəlxalq əhəmiyyətli bütün müsabiqələrdə “laureat” adını qazanmışam. Təhsil mənim üçün hər zaman ön planda olub. Musiqi və akademik dərsləri balanslı şəkildə aparmağa çalışıram”. 

Respublikamızda və Çexiya, İspaniya, Portuqaliya, Yaponiya, Türkiyə, Gürcüstan və s. kimi xarici ölkələrdə təşkil olunan müsabiqələrdə ən yüksək yerlərə, fəxri diplomlara layiq görülmüş istedadlı gənc bildirir ki, iki məktəbdə təhsil almaq çətin olsa da, düzgün planlaşdırma və intizam sayəsində hər birinin öhdəsindən layiqincə gəlməyi bacarır: “Musiqi mənim üçün təkcə peşə deyil, həm də zehni və emosional cəhətdən inkişaf etməyimə kömək edən bir vasitədir. Məhz bu səbəbdən qazandığım təcrübələr mənim uğurlu bir gənc kimi yetişməyimə müsbət təsir göstərir. Daha çox beynəlxalq səviyyəli festivallarda iştirak etdiyim bir ərəfədə təsadüfən internetdə Uşaq İncəsənət Festivalının elanını gördüm. Bu festivalın keçirilmə məqsədi və təşkilatçı qurumların yüksək nüfuzu məni dərhal özünə cəlb etdi. İfa proqramımı hazırlamağa başladım və festivalda iştirak etməyə qərar verdim. Hər bir notda, hər bir ifada mən Heydər Əliyevin Azərbaycan mədəniyyətinə və gəncliyinə olan qayğısını duyaraq səhnəyə çıxdım. Bu mötəbər festival təkcə musiqi deyil, həmçinin rəssamlıq, rəqs, teatr və digər incəsənət sahələri üzrə Azərbaycan mədəniyyətinə öz töhfəsini verməyi arzulayan gənc istedadlar üçün əsl sınaq meydanıdır. Festival həm mənim üçün yeni bir mərhələ oldu, həm də musiqi yolumdakı qərarlılığımı və məqsədimi daha da möhkəmləndirdi. Belə bir festivalda iştirak etmək mənim üçün sadəcə bir çıxış deyil, həm də öz milli dəyərlərimizə olan bağlılığımı ifadə etmək üçün bir fürsət idi. Bu uğur yalnız mənim deyil, həm də müəllimlərim və ailəm üçün də böyük bir qürur mənbəyi oldu”. 

Gələcək arzularını dilə gətirən qalib qeyd edir ki, dəfələrlə orkestr ilə ünsiyyəti onun musiqiyə baxışını daha da genişləndirib və onu yeni bir musiqi sahəsinə – dirijorluğa maraq göstərməyə sövq edib: “Hər bir əsərin incəliklərini anlamaq, orkestrin müxtəlif alətlərinin ahəngini birləşdirərək musiqiyə həyat vermək məni valeh etdi. Hər alətin özünəməxsus səsi, orkestrdə fərqli bir rolu var və dirijor kimi bu səslərin hamısını vahid bir ahəngə gətirmək məndə bu sahəyə böyük həvəs yaratdı. Orkestrin hər bir üzvü ilə harmonik əməkdaşlıq qurmaq, onların hər birinə rəhbərlik edərək musiqinin ruhunu çatdırmaq istəyi böyük arzuya və hədəfimə çevrildi”. 

“Uşaq İncəsənət Festivalı-2025”də iştirak edəcək şagirdlərə tövsiyəsində Ərtoğrul  vurğulayır ki, festival təkcə yarışma deyil, həm də özünü təsdiq etmək və malik olduğu sahənin incəliklərini ustalıqla ortaya çıxararaq onu məharətlə ifadə etməkdir: “Bu həm də onlar üçün sənətkarlar qarşısında bir növ imtahandır. Hazırlıq prosesinə gəlincə, çıxışlara ciddi yanaşmalı, texniki və bədii baxımdan əsərlərə tam hakim olmaq vacib şərtlərdəndir. Səhnəyə çıxmazdan əvvəl həyəcanı azaltmaq üçün müntəzəm məşqlər etmək və mümkün qədər öz üzərində çox çalışmaq faydalıdır. Həmçinin, festivala qatılan digər iştirakçıların çıxışlarını izləmək, fərqli sənət növlərini tanımaq və onlardan ilham almaq da böyük bir fürsətdir. Ən əsas amil səhnəyə böyük sevgi, öz sənətinə dərin inamın olmasıdır. Qələbə həmişə əsas məqsəd olmamalıdır – bu festival sizə sənət yolunda yeni üfüqlər açacaq və təcrübənizi daha da zənginləşdirəcək. Tövsiyəm özünə qəti əminlikdir, bu isə həmişə qələbəyə aparan başlıca meyardır”.

“Gələcək iştirakçılara tövsiyəm odur ki, hər zaman arzularına doğru irəliləsinlər”

Hazırda Bülbül adına Orta İxtisas Musiqi Məktəbinin 9-cu sinfində fortepiano ixtisası üzrə təhsil alan  Amira Məcidova 2009-cu ildə Bakı şəhərində anadan olub. Amira qeyd edir ki, evdə pianino olduğu üçün 5 yaşından onda musiqiyə maraq yaranıb və həvəskar olaraq bu alətdə ifa etməyə başlayıb. Sonradan Bakı Şəhər Mədəniyyət Baş İdarəsi A.Məlikov adına 11 nömrəli onbirillik musiqi məktəbində təhsil alan müsahibimiz müəllimi Zərinə Allahverdiyevanın rəhbərliyi ilə çoxlu sayda müxtəlif yerli və beynəlxalq müsabiqələrdə uğurla çıxış edib, laureat adını qazanıb, diplomlara layiq görülüb. Amira xatırlayır ki, 11 nömrəli onbirillik musiqi məktəbində oxuyarkən Uşaq İncəsənət Festivalının keçirilməsi barədə elan sinif yoldaşları ilə bir yerdə onun da marağına səbəb olub və o, belə bir nüfuzlu yarışmada gücünü sınamaq qərarına gəlib: “Festivalda iştirakçılar üçün yaradılan şərait və mühit bizi heyran etmişdi. Müxtəlif incəsənət növlərini təmsil edən uşaqlar özlərini çox gözəl ifadə edirdi. Burada müxtəlif istedadlar aşkar edilirdi. Qaliblər tutduğu yerlərə görə mükafatlandırıldı, onlara diplom və hədiyyələr təqdim edildi. Festival möhtəşəm təşkil olunmuşdu. Açığı, bu cür əhəmiyyətli festivalda yer tutacağıma əmin deyildim. Birinci yerə layiq görülməyim mənim və ailəm üçün çox xoş sürpriz oldu. Münsiflər heyətinin ədalətli seçimi qalibləri yeni uğurlara imza atmağa ruhlandırır. Mən öz növbəmdə musiqi biliklərimi təkmilləşdirərək müxtəlif yerli və beynəlxalq müsabiqələrdə, konsertlərdə iştirak edirəm. Bu ilin fevral ayında İsveçdə keçirilən "CONSONANCE" VII Beynəlxalq müsabiqəsində uğurla iştirak edərək I yerə çıxdım, müəllimim Leyla Ocaqverdizadə isə təşəkkürnaməyə layiq görüldü”. 

Bülbül adına Orta İxtisas Musiqi Məktəbinə qədər Bakı şəhəri 248 nömrəli tam orta məktəbdə təhsil alan Amira deyir: “Ümumi olaraq dərslərimi yaxşı oxuyuram, musiqi ilə məşğul olmağım digər fənləri oxumağıma mane olmur. Sadəcə musiqi dərslərinə daha çox önəm verirəm, yaradıcılığa çox vaxt ayırıram. İrəlidə hədəfim Üzeyir Hacıbəyli adına Bakı Musiqi Akademiyasına qəbul olmaqdır. “Uşaq İncəsənət Festivalı – 2025”in gələcək iştirakçılarına uğurlar arzulayıram. Onlara tövsiyəm odur ki, hər zaman arzularına doğru irəliləsinlər, Azərbaycanı sevsinlər və sənətləri ilə Vətənlərini şöhrətləndirsinlər”. 

“Festivala 27 min iştirakçı qoşulmuşdu”

Bakı şəhəri 27 nömrəli tam orta məktəbin 7-ci sinif şagirdi Nurcahan Mövlayeva 2012-ci ildə Bakı şəhərində doğulub, musiqi ilə həvəskar olaraq məşğul olub. Nurcahan bizimlə söhbətdə bildirir ki, musiqiyə marağı 7 yaşından yaranıb və valdeynləri ona piano alıblar: “Mən “YouTube”da  videolara baxaraq mahnılar öyrənməyə başladım. Sonra həvəskar şəkildə çox gözəl müəllim, pedaqoq Rəna İbrahimova mənimlə məşğul oldu və  mənə pianoda əsrarəngiz musiqilər ifa etməyi öyrətdi”. 

Nurcahan musiqi ilə məşğul olmağın onu digər dərslərini də oxumağa həvəsləndirdiyini qeyd edir: “Məktəbdə keçirilən tədbirlərdə çox həvəslə pianoda ifa edirəm. Həvəskar piano ifası ilə məşğul olarkən mənə Uşaq İncəsənət Festivalında çıxış etmək təklifi gəldi. Mən sevinclə razılıq verdim və qeydiyyatdan keçdim. Qeydiyyatdan keçdikdən sonra Rəna müəllim ilə davamlı olaraq hazırlaşmağa başladım. Festivala piano, rəqs, digər musiqi alətləri üzrə 27 min iştirakçı qoşulmuşdu. Festival 5-6 ay ərzində 3 mərhələdə keçirildi. Mən 10-13 yaş qrupunda həvəskar iştirakçı kimi mübarizə aparırdım. 1-ci və 2-ci mərhələləri keçdikdən sonra daha inamla çalışmağa başladım.Yarışmalar çox gərgin keçirdi. Münsiflər və kamera çəkilişi bizi daha da məsuliyyətli və səhvsiz çıxış etməyə məcbur edirdi. Finala çıxmağım məni çox sevindirdi. Finalda iştirakım Beynəlxalq Muğam Mərkəzində keçirildi. Sonra səbirsizliklə cavabları gözləməyə başladıq. Çox həyəcanlı, həm də inamlı idim. Nəhayət bir gün səhər saytı yoxlayarkən 10-13 yaşlı həvəskarlar arasında 1-ci yeri tutduğmu gördüm. Olduqca sevindirici və gözəl anlar idi. Hamı məni təbrik etməyə başladı. Sonra isə Heydər Əliyev Mərkəzində mükafatlandırma mərasimi keçirildi. Mənə 1-ci yeri tutduğuma görə diplom, hədiyyələr və pul mükafatı verdilər. Böyük konsert proqramı oldu. Bu festivaldan sonra mən sənədlərimi Leopold və Mstislav Rostropoviçlər adına Onbirillik musiqi məktəbinə təqdim etdim. İmtahan verdim və əla qiymətlə ödənişsiz qəbul oldum. Hazırda musiqi məktəbində müəllimim Afaq Rəhimovanın rəhbərliyi altında peşəkar musiqi təhsili alıram”. 

Gələcək arzularını dilə gətirən istedadlı məktəbli 9-cu sinifdən sonra Asəf Zeynallı adına Musiqi Kollecinə qəbul olmaq istədiyini söyləyir: “Kolleci bitirdikdən sonra isə Azərbaycan Milli Konservatoriyasına daxil olmaq istəyirəm. Builki iştirakçılara tövsiyə edərdim ki, özlərinə inansınlar və heç vaxt ruhdan düşməsinlər”.