“Xarici elmi kitablardan çox istifadə edirəm” – Olimpiada qalibləri uğur sirlərini paylaşır

“Xarici elmi kitablardan çox istifadə edirəm” – Olimpiada qalibləri uğur sirlərini paylaşır



“Xarici elmi kitablardan çox istifadə edirəm” – Olimpiada qalibləri uğur sirlərini paylaşır

Abşeron-Xızı regionu üzrə V Azərbaycan Astronomiya Olimpiadasında birincilik qazanan şagirdlər təəssüratlarını “Azərbaycan müəllimi” ilə bölüşüblər

 Məlum olduğu kimi, aprelin 2-də ümumi təhsil müəssisələrinin IX-XI sinif şagirdləri arasında keçirilən V Azərbaycan Astronomiya Olimpiadasının qalibləri elan olunubSumqayıt şəhər Təbiət Elmləri Təmayüllü Gimnaziyanın X sinif şagirdi Bəxtiyar Ağayev və 23 nömrəli tam orta məktəbin X sinif şagirdi Tuncay Əmiraslanlı uğurlu nəticə göstərərək 1-ci yerə nail olublar. 

Qeyd edək ki, V Azərbaycan Astronomiya Olimpiadasının nəticələrinə görə, 7 nəfər birinci, 11 nəfər  ikinci, 10 nəfər şagird isə üçüncü yerə layiq görülüb. Olimpiadanın final mərhələsinin qalibləri medal və hədiyyələrlə mükafatlandırılacaq və bu il Hindistanda keçiriləcək XVIII Beynəlxalq Astronomiya və Astrofizika Olimpiadasına hazırlıq dərslərinə dəvət olunacaqlar. Hazırlıq dərsləri Bakı Dövlət Universiteti və Respublika Uşaq-Gənclər İnkişaf Mərkəzinin ekspertləri tərəfindən təşkil olunacaq.

“Azərbaycan müəllimi” olimpiadada ən yüksək nəticə göstərmiş Sumqayıt məktəblilərinin təəssüratlarını oxucularına təqdim edir. 

“Qızıl medal alacağıma əmin idim”

 

Bəxtiyar Ağayev  Təbiət Elmləri Təmayüllü Gimnaziyanın əlaçı şagirdlərindəndir. Fizika və riyaziyyat fənlərinə  böyük maraq göstərən olimpiada qalibi deyir: “Mən 7-ci sinifdə fizika fənni üzrə respublika fənn müsabiqəsində iştirak etdim və gümüş medal qazandım. 2022-2023 və 2023-2024-cü tədris illərində respublika fənn olimpiadasında fizika üzrə qızıl medallara layiq görüldüm. 2023-2024-cü tədris ilində qatıldığım Azərbaycan Astronomiya Olimpiadasında gümüş medala, bu il isə birinci yerə nail oldum. Eyni zamanda, 2-12 dekabr tarixlərində Rumıniyanın Buxarest şəhərində keçirilən Yeniyetmələrin 21-ci Beynəlxalq Elm Olimpiadasında (IJSO 2024)  iştirak edib bürünc medala layiq görüldüm. Keçən ildən təcrübəm olduğuna görə bu il Astronomiya Olimpiadasında qızıl medal alacağıma əmin idim. Olimpiadaya Xıdır Mikayılov və Vaqif Əliyevin dəstəyi ilə, əsasən, özüm hazırlaşmışam. Müəllimlərimə dəstək olduqları üçün dərin təşəkkür edirəm. Gələcək hədəfim Beynəlxalq Fizika Olimpiadasında (İPHO) və Beynəlxalq Astronomiya və Astrofizika Olimpiadasında (İOAA) iştirak edib qalib olmaqdır. Bundan sonra isə təhsilimi xarici nüfuzlu universitetlərin birində davam etdirmək istəyirəm”.

“Olimpiadalara hazırlaşmaq səbir və diqqət tələb edir” 

 

Tuncay Əmiraslanlı isə 23 nömrəli tam orta məktəbin nümunəvi şagirdidir: “İndiyə qədər bir çox müsabiqə və olimpiadalarda iştirak etmişəm. 7-ci sinifdə fizika fənni üzrə  Respublika fənn müsabiqəsində, 8-ci və 9-cu siniflərdə Respublika fənn olimpiadalarında ardıcıl olaraq 3 qızıl medal qazanmışam. Eyni zamanda, Naqif Nəbiyev adına fizika müsabiqəsində gümüş medalla təltif olunmuşam. Bundan əlavə, Azərbaycan Astronomiya olimpiadalarında 2022-2023-cü tədris ilində həvəsləndirici mükafat, 2023-2024-cü tədris ilində isə qızıl medal əldə etmişəm. 9-cu sinif buraxılış imtahanında 300 bal toplayaraq maksimum nəticə göstərmişəm. V Azərbaycan Astronomiya Olimpiadasında yüksək nəticə göstərməyim məni çox sevindirir və gələcək müsabiqələrdə də uğur qazanmaq üçün motivasiya verir. Ən sevdiyim fənlər fizika və riyaziyyatdır. Olimpiadalara hazırlaşmaq ciddi vaxt, səbir və diqqət tələb edir. Hazırlıq prosesində xarici elmi kitablar və məqalələrdən çox istifadə edirəm, eyni zamanda, Xıdır Mikayılov və Vaqif Əliyevin dərslərində iştirak etmişəm. Astronomiya olimpiadalarına 8-ci sinifdən qatıldığım üçün proqramla tanış idim və çətinlik çəkmədim. Gələcəkdə hədəfim astronomiya və fizika üzrə beynəlxalq olimpiadalarda ölkəmi təmsil edərək uğur qazanmaq, ixtisasım üzrə özümü inkişaf etdirməkdir”.

Facebookda bizi izləyin

Telegram kanalı

Whatsapp kanalı

Oxşar Xəbərlər