Hərbi təhsildə yeni yanaşmalar və gələcək perspektivlər

Hərbi təhsildə yeni yanaşmalar və gələcək perspektivlər

Güclü və peşəkar ordu quruculuğunda hərbi təhsilin rolu danılmazdır. Müasir dövrün çağırışları, qlobal təhlükəsizlik mühitində baş verən dəyişikliklər və texnologiyaların sürətli inkişafı hərbi təhsil sisteminin də daim yenilənməsini və təkmilləşdirilməsini zəruri edir. Artıq klassik döyüş hazırlığı ilə kifayətlənmək mümkün deyil,  bu gün müasir biliklərə, yüksək mənəvi-psixoloji hazırlığa və çevik qərarvermə qabiliyyətinə malik hərbi kadrların yetişdirilməsi əsas prioritetə çevrilib.

Yeni yanaşmalar

Son illərdə Azərbaycanda hərbi təhsildə tətbiq edilən yeniliklər təqdirəlayiqdir. Ənənəvi dərs metodikası ilə yanaşı, simulyasiya sistemləri, elektron tədris vasitələri, sahə təlimləri və komanda əsaslı öyrənmə modelləri geniş tətbiq olunmağa başlanıb. Bu yanaşma kursantlarda yalnız nəzəri biliklərin deyil, həm də praktiki bacarıqların formalaşmasına şərait yaradır.
Əlavə olaraq, beynəlxalq təcrübə də tədris prosesinə inteqrasiya edilir. NATO standartlarına uyğun təlim modulları, xarici ölkələrlə mübadilə proqramları və birgə təlimlər Azərbaycanın hərbi təhsil sistemini dünya standartlarına yaxınlaşdırır.

Müasir Zabit profili

Bu günün və sabahın zabiti yalnız döyüş meydanında deyil, eyni zamanda informasiya müharibəsi, kiber təhlükəsizlik, diplomatiya və liderlik sahələrində də bacarıqlı olmalıdır. Buna görə də hərbi təhsil proqramlarında hüquq, psixologiya, kommunikasiya və informasiya texnologiyalarına dair dərslərin xüsusi çəkisi artırılır. Həmçinin kursantların milli vətənpərvərlik ruhunda yetişdirilməsi daim diqqət mərkəzində saxlanılır.

Gələcək perspektivlər

Azərbaycan Respublikasının müdafiə strategiyasında hərbi təhsilin inkişafı prioritet istiqamət kimi müəyyən olunub. Yeni hərbi təhsil müəssisələrinin yaradılması, mövcud tədris ocaqlarının maddi-texniki bazasının gücləndirilməsi, müəllim heyətinin ixtisasartırması və beynəlxalq əlaqələrin genişləndirilməsi gələcək illərdə də həyata keçiriləcək əsas məsələlərdəndir.

Son illərdə ölkənin müxtəlif bölgələrində hərbi təhsil müəssisələrinin şəbəkəsi genişlənib. Hazırda fəaliyyətdə olan əsas təhsil ocaqları sırasında aşağıdakı hərbi lisey və kolleclər mühüm yer tutur:

Cəmşid Naxçıvanski adına Hərbi Lisey – Bakıda yerləşən və Azərbaycanın ilk hərbi liseyi olan bu müəssisə on minlərlə gəncin zabit kimi formalaşmasına zəmin yaradıb.

Heydər Əliyev adına Hərbi Lisey (Naxçıvan şəhəri) – Muxtar respublika səviyyəsində fəaliyyət göstərən bu lisey regionun hərbi təhsil ehtiyaclarını qarşılayır.

Bakı, Naxçıvan və Gəncə Hərbi kollecləri – Yeni yaradılan bu kolleclərin əsas məqsədi müasir bilik və bacarıqlara malik, yüksək hazırlıqlı peşəkar hərbi kadrlar, yəni gizirlər yetişdirməkdir.

Heydər Əliyev adına Azərbaycan Ali Hərbi Məktəbi – Silahlı Qüvvələrin ali zabit heyətini hazırlayan bu ali məktəb zabitlik peşəsinin yüksək səviyyədə tədrisini təmin edir.

Gələcək perspektivlər arasında hərbi tədris proqramlarının beynəlxalq standartlara uyğunlaşdırılması, kiber təhlükəsizlik və müasir texnologiyaların tətbiqi sahəsində ixtisaslaşma, eləcə də xarici tərəfdaşlarla birgə təlimlərin genişləndirilməsi də mühüm yer tutur.

Hərbi təhsil sadəcə dərs və məşqlər toplusu deyil – bu həm də vətənpərvərliyin, məsuliyyətin və liderliyin formalaşdığı bir məktəbdir. Azərbaycan gəncliyinin bu məktəbdə yetişməsi, dövlətimizin təhlükəsizliyinə və güclü ordusuna olan inamın bariz göstəricisidir. Gələcək perspektivlər isə bizə göstərir ki, hərbi təhsil daim yenilənəcək, inkişaf edəcək və yeni zəfərlərin təməlini qoyacaq.

Bu təhsil müəssisələrinin yaradılması və inkişafı gənclərin kiçik yaşlardan vətənə sədaqət, nizam-intizam və yüksək mənəvi dəyərlərlə formalaşmasına imkan verir. Bununla yanaşı, hərbi təhsilin regionlar üzrə əlçatan olması, ölkənin müdafiə potensialının ümumilikdə güclənməsinə də mühüm töhfə verir.