25 ilin işığında

25 ilin işığında

Ulu Öndərin xeyir-duası ilə fəaliyyətə başlayan Naxçıvan Müəllimlər İnstitutunun tarixi yoluna baxış

2025-ci il Naxçıvan Müəllimlər İnstitutu üçün ən əlamətdar illərdən biridir. Bu il doğma institutumuzun fəaliyyətinin 25 ili tamam olur. 25 ildir ki, Ulu Öndər Heydər Əliyevin imzası ilə yaradılan bu elm ocağının şöləsi Azərbaycanın bütün bölgələrinə işıq saçır, minlərlə gəncin təhsil almasına, yüksəkixtisaslı kadr kimi yetişməsinə və təlim-tərbiyəsinə xidmət edir. 

Naxçıvan Müəllimlər İnstitutunun məhz Ulu Öndər Heydər Əliyevin yadigarı olması bizi daha da qürurlandırır. Ölkəmiz üçün yüksək potensiala, müasir intellektə, təfəkkürə malik, rəqabətqabiliyyətli kadrlar, ixtisaslı müəllimlər hazırlayan bu ali təhsil müəssisəsinin əsası milli təhsilimizin böyük himayədarı Ümummilli Lider Heydər Əliyevin müvafiq fərmanı ilə 13 iyun 2000-ci ildə qoyulub. Nazirlər Kabinetinin 26 avqust 2003-cü il tarixli qərarı ilə müstəqil ali məktəb statusu alan institutumuz qısa zamanda böyük inkişaf yolu keçib, məzunları ilə ölkəmizin  hər yerində tanınıb. 

Ulu Öndərin siyasi kursunun layiqli davamçısı Müzəffər Ali Baş Komandan İlham Əliyevin təhsil sahəsinə göstərdiyi davamlı diqqət və qayğıdan Naxçıvan Müəllimlər İnstitutu da böyük pay alıb. Belə ki, yeni, tam təmir edilmiş müasir maddi-texniki baza ilə təchiz olunmuş institut binası 2018-ci ilin may ayında istifadəyə verilib. Çox xoşbəxtəm ki, institutumuzun yeni binasının açılış mərasimində mən də iştirak etmişəm. Açılış mərasimində dövlət başçımız institutun professor-müəllim heyəti ilə yaxından görüşüb, səmimi söhbət edib və özünün təbrik və tövsiyələrini çatdırıb: “İlk növbədə, sizi Müəllimlər İnstitutunun yeni binasının açılışı münasibətilə təbrik etmək istəyirəm. Gözəl binadır, çox gözəl şərait yaradılıb. Memarlıq baxımından da Naxçıvan şəhərini daha da gözəlləşdirir... Ulu Öndər Azərbaycan Prezidenti kimi həmişə Naxçıvana diqqət, qayğı göstərirdi. Naxçıvana tez-tez səfərlər edirdi... Mən də Ulu Öndərin siyasi xəttinə sadiq qalaraq bütün sahələrdə, o cümlədən Naxçıvana qayğı, diqqət məsələlərində o yolu davam etdirirəm”.

Naxçıvan Müəllimlər İnstitutu müvafiq səviyyələr üzrə ali təhsil proqramlarını həyata keçirən, pedaqoji-metodiki və tətbiqi elmi-tədqiqatlar aparan ali təhsil müəssisəsidir.

Qeyd edək ki, Naxçıvan Müəllimlər İnstitutunda fəlsəfə doktoru hazırlığı üzrə Dissertasiya Şurası yaradılıb. Dissertasiya Şurasında onlarla doktorant və dissertanta elmi-tədqiqatçılıq qabiliyyətlərini inkişaf etdirmək və təkmilləşdirmək üçün lazımi şərait yaradılıb, onlar öz dissertasiya işlərini müvəffəqiyyətlə müdafiə edərək müxtəlif elmi dərəcə və elmi adlara layiq görülüblər. 

Naxçıvan Müəllimlər İnstitutunda bakalavriat və magistratura səviyyələri üzrə kadr hazırlığı aparılır. Bakalavriat səviyyəsində adları çəkilən ixtisaslar üzrə (Azərbaycan dili və ədəbiyyatı müəllimliyi, İbtidai sinif müəllimliyi, Tarix müəllimliyi, Məktəbəqədər təhsil, Xarici dil müəllimliyi (ingilis dili), Riyaziyyat və informatika müəllimliyi, Təsviri incəsənət müəllimliyi, Təhsildə sosial-psixoloji xidmət, Kitabxanaçılıq və informasiya fəaliyyəti, Korreksiyaedici təlim, Texnologiya müəllimliyi), magistratura səviyyəsində isə 4 ixtisas üzrə (Pedaqogika nəzəriyyəsi və tarixi, Təhsildə sosial-psixoloji xidmət, Riyaziyyat müəllimliyi, Təsviri incəsənət müəllimliyi) və ayrı-ayrı ixtisasların təhsil proqramları əsasında ali təhsilli mütəxəssislər, peşəkar müəllimlər, doktorantura təhsil səviyyəsində isə yüksəkixtisaslı elmi və elmi-pedaqoji kadrlar hazırlanır. 

İnstitut olaraq əsas məqsədimiz dövlət standartlarına uyğun, zəruri biliyə, həyati bacarıqlara, intellektual, mədəni və mənəvi dəyərlərə malik olan, müxtəlif sahələr üzrə pedaqoji-metodiki və tətbiqi elmi-tədqiqatlar aparan ali təhsilin müxtəlif səviyyələri üzrə yüksəkixtisaslı mütəxəssislər, elmi-pedaqoji kadrlar hazırlamaqdan, Vətənini sevən, ölkəsinin, dövlətinin maraqlarını üstün tutan, xalqının adət-ənənələrinə, milli-mənəvi dəyərlərinə hörmətlə yanaşan vətənpərvər gənclər və ixtisaslı kadrlar yetişdirməkdən ibarətdir. 

Mübaliğəsiz demək olar ki, son illərdə Naxçıvan Müəllimlər İnstitutu tədrisin keyfiyyətinə görə yeni inkişaf mərhələsinə qədəm qoyub. Bu, ali təhsil müəssisəsində daha çox həm maddi-texniki bazanın, həm tədrisin, həm sosial həyatın, həm də elmi fəaliyyətin inkişafında özünü göstərir. Bu gün professor-müəllim və tədrisə köməkçi heyətin gənc kadrlarla əvəzlənməsi nəticəsində institutun məzunları davamlı olaraq doğma təhsil ocağında işlə təmin olunur.

Xüsusi olaraq qeyd edilməlidir ki, ölkədə müəllim hazırlığı prosesinə diqqət artırılıb, müəllimlərin  işə qəbulunda yeni sistem hazırlanıb, bu sistem qısa müddət ərzində özünü doğrulda bilib. Bunun nəticəsində məzunlarımız müəllimlərin işə qəbulu imtahanlarında fəal iştirak edib, yüksək nəticələr göstərərək respublikamızın müxtəlif rayon və kəndlərində  işlə təmin olunublar. 

Adlı təqaüdlərin təsis edilməsi, həmçinin tələbələrin digər həvəsləndirici tədbirlərə cəlb olunması təhsilalanlarda tədrisə olan marağı daha da artırır, onları ixtisaslarına uyğun mükəmməl təhsil almağa və mənimsədikləri bilik və bacarıqları möhkəmləndirməyə sövq edir. 

İnstitutda tələbələrin maraq dairəsinə uyğun fəaliyyətlərin genişləndirilməsi, yaradıcılıq qabiliyyətlərinin və məlumat dairələrinin inkişaf etdirilməsi, onların sosial və digər problemlərinin həllinə dəstək və qayğının göstərilməsi, bir sözlə, səmimi təhsil mühitinin yaradılması gənclərimiz üçün  institutu doğma, əziz məkan kimi cəlb, abituriyentləri buranı seçməyə, burada təhsil almağa, təhsilini davam etdirməyə təşviq edir. 

Naxçıvan Müəllimlər İnstitutu həm xaricdə, həm də daxildə fəaliyyət göstərən qabaqcıl təhsil müəssisələri ilə daim əlaqələri genişləndirir. Xarici ölkələrin ali təhsil müəssisələri, təşkilatları ilə, beynəlxalq qurum və fondlarla əlaqə yaradılır, əməkdaşlıq haqqında müqavilələr bağlanılır, qarşılıqlı əməkdaşlıq həyata keçirilir. 

Həmçinin institut əməkdaşları müxtəlif ixtisaslar üçün müxtəlif istiqamətlərə aid dərslik, dərs vəsaitləri, tədris və tədris-metodik ədəbiyyatlar hazırlayır və həm xarici, həm də daxili indeksli jurnallarada dərc etdirir. 

İnstitutun “Elmi əsərlər” jurnalı Azərbaycan Respublikasının Prezidenti yanında Ali Attestasiya Komissiyasının reyestrinə daxil edilib və beynəlxaq kodla ildə dörd dəfə nəşr olunur.   

Hər tədris ilində təsdiq edilən iş planı və qrafik əsasında fəaliyyət istiqamətlərinə uyğun məsələlərlə bağlı elmi-praktik konfranslar (beynəlxalq və respublika), “Heydər Əliyev dərsləri”, müşavirələr, elmi-nəzəri seminarlar, müsabiqələr, bilik yarışları keçirilir, dinləyicilər Ulu Öndər Heydər Əliyevin həyat və fəaliyyəti haqqında məlumatlandırılır. Ulu Öndərin irsində Vətən sevgisi, azərbaycançılıq məfkurəsi, dil, milli mədəniyyət sevgisi, milli-mənəvi dəyərlərə bağlılıq, xalqına, dövlətinə sonsuz sədaqət hissi mühüm yer tutur. Bu irsin qorunması və gələcək nəsillərə çatdırılması, hər bir gəncdə azərbaycançılıq hissinin formalaşdırılması ən vacib vəzifələrdən sayılır.

İkinci Qarabağ müharibəsi göstərdi ki, məktəblərimizdə təhsil alan gənc nəslin azərbaycançılıq ideologiyası əsasında tərbiyə edilməsi Azərbaycan müəllimlərinin və həmin müəllimləri hazırlayan ali təhsil müəssisələrinin fəaliyyətinin əsasını təşkil edir. Bu gün əminliklə deyə bilərik ki, Azərbaycan məktəbi, Azərbaycan müəllimi və onların yetişdirdiyi Azərbaycan gəncliyi bu imtahandan üzü ağ, alnı açıq çıxdı. Məhz bu məktəblərdə müəllimlərdən əxlaq, mənəviyyat, düşmənə nifrət dərsi alan, şəhidliyin fəlsəfi anlamını dərk edən gənclər öz qanları, canları bahasına təcavüzkarlara hədlərini bildirdilər, onları təslim aktını imzalamağa məcbur etdilər.

30 ildən artıq düşmən tapdağı altında inləyən torpaqlarımızın Müzəffər Ali Baş Komandan cənab İlham Əliyevin rəhbərliyi ilə işğaldan azad edilməsi şanlı tariximizin ən parlaq səhifəsinə çevrildi. Ulu Öndər Heydər Əliyev böyük uzaqgörənliklə deyirdi: “Mənim görüb başa çatdıra bilmədiyim işləri Azərbaycan xalqının dəstəyi ilə İlham Əliyev başa çatdıracaq”. Doğrudan da, Ulu Öndərin başa çatdıra bilmədiyi, arzusunda olduğu işləri cənab Prezident layiqincə yerinə yetirdi. Müzəffər Ali Baş Komandan İlham Əliyev öz siyasi gücü, məntiqi düşüncəsi, milli iradəsi hesabına xalqımızın dəstəyi və yenilməz ordumuzun rəşadəti və şücaəti sayəsində Azərbaycanın ərazi bütövlüyünü təmin etdi, torpaqlarımızı düşmən işğalından azad etdi. Bu tarixi qələbə cənab Prezidentin daxili və xarici siyasətinin məntiqi nəticəsi idi. 44 gün ərzində rəşadətli Silahlı Qüvvələrimiz Ali Baş Komandanın rəhbərliyi ilə Ermənistan ordusunu darmadağın edərək tarixə şanlı Zəfər salnaməsi yazdı. 

Vətən müharibəsində misilsiz qəhrəmanlıq göstərən, adlarını qızıl hərflərlə tarixə yazan əsgər və zabitlərimiz sırasında Naxçıvan Müəllimlər İnstitutunun tələbə və məzunları da var. 44 günlük savaşda torpaqlarımızın mənfur düşməndən azad olunmasında canlarından keçmiş, şəhidlik zirvəsinə yüksələn qəhrəman oğullardan 2 nəfəri - Kamran Hüseynov və Ruhid İslamlı məhz Naxçıvan Müəllimlər İnstitutunun məzunudur.

İnstitut əməkdaşlarının səmərəli fəaliyyəti dövlətimiz tərəfindən daim yüksək qiymətləndirilib. 

Bir sözlə, institutumuz dövlətimizin ali təhsil müəssisələri qarşısında qoyduğu vəzifələri və özünün qəbul etdiyi bütün öhdəlikləri layiqincə yerinə yetirir. 

Bu bir həqiqətdir ki, Ulu Öndər Heydər Əliyevin müdrik siyasəti sayəsində bu gün Azərbaycan hərtərəfli inkişaf, tərəqqi edir. Nə qədər ki Ulu Öndər Heydər Əliyevin memarı olduğu  müasir, müstəqil, bütöv Azərbaycan vardır, Zəfər çalmış Müzəffər xalqımız daha böyük uğurlara şahidlik edəcək.