Fırçası ilə nağıllar yaradan 14 yaşlı rəssam

Onu təsadüfən sosial şəbəkədə – Naxçıvan Rəssamlar Birliyinin paylaşımında gördüm. Gənc rəssamı ad günü münasibətilə təbrik edirdilər. Bir əsərinə baxdım, o qədər təsirləndim ki, az sonra internetdə onun adını axtarıb, çəkdiyi bütün rəsmləri tapdım. Məcazi yox, sözün əsl mənasında sənətin sehrinə düşmüşdüm.
Bəs bu sehrli fırçanın sahibi kimdir?

“Azərbaycan müəllimi” oxucularını istedadlı gənc rəssam Yusif Qasımlı ilə tanış edir.

Yusif Qasımlı 2011-ci il oktyabrın 13-də Qazax rayonunun Hüseynbəyli kəndində anadan olub. Hərbçi ailəsində dünyaya gələn Yusif atasının xidməti ilə əlaqədar ailəsi ilə birlikdə Naxçıvana köçüb. Hazırda Kəngərli rayon Qıvraq qəsəbə tam orta məktəbinin 8-ci sinif şagirdidir.

O, 5 yaşından rəssamlığa maraq göstərib. Artıq 8 ildir ki, Məhdud Fiziki İmkanlı İnsanlar üçün Naxçıvan Regional İnformasiya Mərkəzinin benefisiarıdır. Kiçik yaşlarından rəssam Nigar Mustafazadə onunla fərdi şəkildə məşğul olur.

Elə biz də Yusiflə Mərkəzin rəsm dərnəyində tanış oluruq. Sakit, bir az da utancaq görünür. Rəsm lövhəsinin qarşısında diqqətlə işləyir. Fırçanın hər toxunuşunda bir duyğu var.

Anası Cəvahir Qasımova isə gülümsəyərək onun ilk rəsm hekayəsini xatırlayır: “Hələ uşaq vaxtlarından evdəki kitabların şəkillərini sadə karandaşlarla rəngləyirdi. Sonra evin divarlarına öz dünyasını köçürməyə başladı. Müəllimi Nigar xanımla tanış olandan sonra istedadını kəşf etdik. Əvvəlcə sadə xətlər, fiqurlar çəkirdi. Üç ildir ki, kətan üzərində işləməyə başlayıb”.

Yusifin bu yaşa qədər üç fərdi sərgisi keçirilib. İlk sərgisi – “Sehirli dünyam” 2023-cü ilin aprelində Naxçıvan Rəssamlar Birliyinin Bəhruz Kəngərli adına sərgi salonunda baş tutub və böyük maraqla qarşılanıb. O, bir çox müsabiqələrdə iştirak edib, müxtəlif diplom və mükafatlara layiq görülüb. 2023-cü ildə Təhsil Nazirliyi tərəfindən təhsildəki uğurlarına görə təltif olunub.

Cəvahir xanım deyir ki, bu nailiyyətlərin arxasında böyük zəhmət və səbir dayanır: “Rəsm müsabiqələrində, sərgilərdə daim onun yanındayıq. Yusifin uğurlarını gördükcə qəlbim qürurla dolur. Mən onun gələcəyini çox parlaq görürəm. İnanıram ki, o, paytaxtda da sərgilərini açacaq və bir gün dünya Yusifi tanıyacaq”.

Yusif isə hər dəfə diplom və hədiyyə alanda uşaq təvazökarlığı ilə sevinir: “Artıq tədbirlərə o qədər alışıb ki, “tədbirimiz var” deyəndə həyəcanlanır,” – deyir anası. “Rəsm çəkəndə isə bütün diqqətini ora cəmləyir”.
Biz də bu diqqətin şahidi oluruq.

– Yusif, nə çəkirsən? – deyə soruşuram.
– Nizami Gəncəvini və onun “Yeddi gözəl” əsərini, – cavab verir.
– Rəsm çəkməyi sevirsən?
– Bəli, çox sevirəm.
– Ən çox nəyi çəkməyi xoşlayırsan?
– Təbiət rəsmlərini, su və mənzərəni.

Anası söhbətə qarışır: “Kənddə çox vaxt keçirdiyi üçün təbiət onun üçün çox doğmadır. Çölə çıxanda ətrafı diqqətlə izləyir, sonra gördüklərini rəsmə köçürür”.

Düşünürəm ki, Yusif axar suda, təbiətin rənglərində öz dünyasını tapıb. Elə bir dünya ki, bəlkə də sözlə ifadə edə bilmədiyi duyğularını bu dünyada rənglərlə danışır.

Müəllimi Nigar Mustafazadə isə onun istedadına xüsusi dəyər verir: “14 yaşlı rəssamımız təbiət mənzərələri, natürmort və məişət janrında rəsmləri daha çox sevir. İlk vaxtlar xırda fiqurlar və rəngləmə ilə başladıq. Sonra kətana keçdik. Üç ildir kətanla işləyirik – bu, asan deyil. Amma Yusif portret janrından başqa bütün janrlarda işləyir”.

Nigar xanım Məhdud Fiziki İmkanlı İnsanlar üçün Naxçıvan Regional İnformasiya Mərkəzinin rəssam təlimatçısı və Rəssamlar Birliyinin üzvüdür. O, Yusifin həm müəllimi, həm də yol göstərənidir: “Mən hələ onu tam sərbəst buraxmıram. Amma xoşbəxtəm ki, benefisiarda maraq və özünə inam yarada bilmişik. Elə uşaqlar olur ki, bizə depressiv halda gəlirlər. Rənglərlə işlədikcə, özlərini tapırlar. Yusif həm asudə vaxtını maraqlı keçirir, həm də inkişaf edir”.

Bu münasibət artıq təkcə müəllim–şagird əlaqəsi deyil, bir doğmalıqdır. Nigar xanım gülümsəyərək deyir: “Sanki mənim də övladımdır.” Onların arasında səssiz bir anlaşma var – müəllimin baxışı ilə Yusif nə edəcəyini anlayır. O sevgini hiss edir, ona görə də işləməyə həvəsli olur.

Müəllimi bildirir ki, Yusif sevdiyi mənzərə rəsmlərini çəkəndə daha çox həvəslənir: “Bəzi işləri 2–3 dərsdə bitiririk, amma elə rəsmlər də olur ki, həftələrlə çəkir. O qədər diqqətlidir ki, bir ton fərqinə görə yenidən işləyir”.

Nigar xanımın arzuları isə Yusifin fırçası qədər rəngarəngdir: “Onun beynəlxalq sərgilərə çıxmasını çox istəyirəm. Yusif Naxçıvanda tanınıb, amma istəyirəm ki, ölkə səviyyəsində və dünyada da tanınsın”.
Biz də bu arzulara qoşuluruq. Çünki sənət sərhəd tanımayan bir dildir. Kim bilir, bəlkə də hələ 14 yaşında ikən bu qədər duyğu və rəng yaradan Yusifi bir gün bütün dünya tanıyacaq...