"IB proqramı üzrə tədris təcrübəmizi paylaşmağa hazırıq" – Məktəb direktoru

Azərbaycanda IB-nin (Beynəlxalq Bakalavr) DP (Diploma Programme) proqramı ilə tədris aparılan iki məktəb var. Onlardan biri Bakı şəhəri Tofiq İsmayılov adına 6 nömrəli lisey, digəri isə 132–134 nömrəli Təhsil Kompleksidir.

132–134 nömrəli Təhsil Kompleksinin direktoru Aygün Mikayılova “Azərbaycan müəllimi” nə açıqlamasında  rəhbərlik etdiyi məktəbdə tətbiq edilən beynəlxalq təhsil proqramları haqqında danışıb.

O qeyd edib ki, məktəbdə 2017-ci ildən IB-nin DP proqramı ilə tədris təşkil edilib. Proqram hazırda həm NYP (Middle Years Programme), həm də PYP (Primary Years Programme) səviyyələrində də tətbiq olunur.

Aygün Mikayılovanın sözlərinə görə, IB proqramlarına şagirdlərin qəbulu ingilis dili, riyaziyyat və təbiət elmləri üzrə imtahan əsasında həyata keçirilir:
“Qəbul nəticələri uğurludur və şagirdlər həm Avropa ölkələrinin, həm də Azərbaycanın ingilisdilli tədris müəssisələrinə qəbul olunurlar”.

O əlavə edib ki, müəllimlər IB proqramı üzrə dərs deməyə başlamadan öncə xüsusi təlimlərdən keçir və yalnız sertifikatlaşdırıldıqdan sonra tədrisə cəlb edilirlər.
Direktor IB proqramının dövlət məktəblərində geniş tətbiqinin tərəfdarı olduğunu vurğulayıb: “IB-nin yanaşması daha çevikdir, şagirdlərdə tənqidi düşüncə və yeni baxış formalaşdırır. Dövlət məktəblərində bu proqramın tətbiqi uğurlu modeldir və bizim məktəb bu sahədə təcrübəsini paylaşmağa hazırdır”.