Şuşaya qızıl medalla qayıtdıqları üçün çox sevinclidirlər - SAF 2025-in qalibləri 

Elm və Təhsil Nazirliyinin dəstəyi, “STEAM Azərbaycan” layihəsinin təşkilatçılığı ilə bu il 5-ci dəfə keçirilən SAF 2025 festivalında Şuşa məktəbliləri birincilik əldə edərək qızıl medal qazanıblar.

Qalib komandanın üzvləri təəssüratlarını “Azərbaycan müəllimi” ilə bölüşüb.

Şuşa şəhər 1 nömrəli tam orta məktəbin 4-cü sinif şagirdi Dəniz Nəsirova bu qələbənin onlara çalışmaq, analiz etmək və heç vaxt təslim olmamağı öyrətdiyini bildirir. Bəzən ruhdan düşsələr də komanda olaraq qazandıqları bu uğuru hədəflədiklərini deyir:

“SAF 2025-də “Gələcəyin mühəndisləri” kateqoriyasında “Vincibot” layihəmizlə qalib olduq. Biz “Vincibot”u müxtəlif sensorlara əsaslanan alqoritmlərlə kodlaşdırdıq və tapşırığı tam avtomatik yerinə yetirəcək şəkildə hazırladıq. Yarış müddətində kodumuzu dəfələrlə test edib təkmilləşdirirdik, çünki hər kiçik detal nəticəyə təsir edirdi”.

Təqdim etdikləri robotun işini kodlaşdırmağı və müəyyən tapşırıqların yerinə yetirilməsini 90 saniyə ərzində təmin edən komanda üzvləri Şuşaya qalib qayıtdıqları üçün daha da sevinclidirlər.

Komandanın digər üzvü Nilay Məmmədli də həyəcanlı və sevincli olduğunu dilə gətirir.

“Həyəcanlı idik. Çünki uzun müddətdir ki, bu layihə üzərində çalışırdıq. Bu qələbə bizim üçün sadəcə mükafat deyil, həm də zəhmətimizin qiymətləndirilməsidir. Komanda olaraq hər bir funksiyanı ayrı-ayrılıqda hazırlayıb sonra birləşdirdik və bu, uğurumuzun ən vacib hissəsi oldu. Finalda robotumuzun tapşırığı problemsiz yerinə yetirməsi bizim üçün böyük qürur idi. Bu qalibiyyət bizi daha böyük layihələrə həvəsləndirir”.

Komanda üzvlərinin müəllimi, həm də koordinatoru olan Afaq Süleymanova da fikirlərini bizimlə bölüşüb. O, bu qələbənin yalnız bir nəticə deyil, uzun müddət davam edən zəhmətin, əzmin və rəhbərlik ruhunun nəticəsi olduğunu qeyd edir.

“Komandamla birlikdə, aylar ərzində yorulmadan çalışdıq, çətinliklərə sinə gərdik və nəticədə bu zəfəri qazandıq. Şuşanın ruhunu, onun qələbə əzmini komandama aşıladım və inanırdım ki, bu uğur bizimlə olacaq. Əldə etdiyimiz qələbə, həm də bizim birgə əzmimizin və uğurumuzun təcəssümüdür. Bu müddət ərzində məktəb kollektivi və valideynlər də bizə dəstəyini əsirgəmədi. İnanıram ki, qələbəmiz yeni uğurlara yol açacaq”.