Uzunmüddətli proqramlara karyera hədəfi olanlar üstünlük verirlər - Peşə Təhsil Mərkəzinin mütəxəssisi

Peşə təhsilində tələbə qəbulu göstəricilərinin təhlili göstərib ki, 6 ay – 1 ilədək proqramlar üzrə təhsil almaq istəyənlərin  sayı üstünlük təşkil edir. Məsələn, İsmayıllı Dövlət Peşə Təhsil Mərkəzində 2025-2026-cı tədris ilində ümumi qəbul olanların sayı 446 nəfər təşkil edib. Bunun 74.4 faizi texniki, 22.2 faizi yüksək texniki, 3.4 faizi isə ilkin texniki peşə təhsili üzrə olub. Maraqlıdır ki, ilkin texniki peşə (6 aylıq) proqramı üzrə 1 qrup formalaşdırılıb, həmin qrupa qəbul olunan 15 nəfərin 7-si qadın olub

İsmayıllı Dövlət Peşə Təhsil Mərkəzinin keyfiyyət təminatı üzrə mütəxəssisi Hədiyyə Osmanlı “Azərbaycan müəllimi”nə bildirib ki, texniki peşə təhsili üzrə qəbul olunanların əksəriyyəti, yəni 55 faizi 1 illik proqramlara üstünlük verib. 2 illik proqramların payı 32.8 faiz, 3 illik proqramların payı isə 12 faiz təşkil edib: “Bu göstəricilər qısa müddətdə əmək bazarına çıxış imkanı verən proqramlara tələbin daha yüksək olduğunu təsdiqləyir”.

Müəssisədə qısamüddətli proqramların təşkili istiqamətində fəaliyyətdən danışan mütəxəssis bildirib ki,  2025-ci il üzrə SİİS layihəsi çərçivəsində müxtəlif istiqamətlər üzrə qısamüddətli təlimlər təşkil olunub, ümumilikdə 77 nəfər bu təlimlərə cəlb edilib: “Eyni zamanda qısamüddətli kurslar üzrə 166 müraciətin qeydə alınması bu istiqamətə olan yüksək marağın göstəricisidir”.
Ümumilikdə təhlillər göstərir ki, peşə təhsilində əsas tələbat 6 ay – 1 il aralığında olan proqramlara yönəlib: “Bu istiqamət daha çox əmək bazarına operativ inteqrasiya, praktik bacarıqların qısa müddətdə əldə olunması və ixtisas dəyişmə imkanları ilə əlaqələndirilir. Daha uzunmüddətli proqramlara isə əsasən dərin ixtisaslaşma və davamlı karyera perspektivi hədəfləyən şəxslər üstünlük verirlər”.

İsmayıllı Dövlət Peşə Təhsil Mərkəzində planlaşdırma zamanı əvvəlki dövrün göstəriciləri və əmək bazarının tələbləri də əsas götürülüb: “Qısamüddətli kursların əsasən İT və texniki sahələr üzrə təşkili nəzərdə tutulub. Bu çərçivədə “Backend developer”, “Python” proqramlaşdırma, “Oracle PL/SQL”, Veb dizayner, Qrafik dizayner, İT mütəxəssisi (proqram təminatçısı və inkişafçısı), həmçinin Elektrik-qaz qaynaqçısı istiqamətləri üzrə təlimlərin təşkili planlaşdırılır. Bu sahələr üzrə artan maraq rəqəmsal bacarıqların və texniki ixtisasların əmək bazarında prioritet mövqe tutduğunu göstərir”.

Bununla yanaşı, 1 illik proqramlar üzrə qəbul planında əmək bazarında yüksək tələbat olan və praktik bacarıqların formalaşdırılmasına yönəlmiş ixtisaslara üstünlük verilib:

“Xidmət, texniki və kənd təsərrüfatı yönümlü ixtisaslar, eləcə də informasiya texnologiyaları sahəsi üzrə texniki dəstək istiqamətləri üzrə marağın davam edəcəyi gözlənilir. Beləliklə,  həm əvvəlki ilin nəticələri, həm də cari il üzrə formalaşan maraqlar göstərir ki, qısa müddətdə nəticə verən, praktik yönümlü və əmək bazarının tələblərinə uyğun proqramlar üzrə təkliflərin genişləndirilməsi strateji baxımdan məqsədəuyğundur”.