Süni intellekt ölüm yaşını hesablayacaq

ABŞ, Danimarka və İsveçrə alimləri süni intellektə əsaslanan və insanın nə vaxt öləcəyini proqnozlaşdıra bilən texnologiya hazırlayıblar. 

“Azərbaycan müəllimi” xəbər verir ki, Qərb alimlərinin sağlamlıq və həyat tərzi ilə bağlı məlumatlardan istifadə edərək hazırladığı “life2vec” neyron şəbəkəsi insanın nə qədər yaşayacağı ilə bağlı real nəticələrə yaxın cavablar almağa imkan verə bilər. Araşdırmalar göstərib ki, proqnozun dəqiqliyi təxminən 80 faizdir.

Bu dəqiqlik səviyyəsi 6 milyon Danimarka sakininin məlumatları əsasında aparılmış araşdırma nəticəsində əldə edilib. Araşdırma zamanı neyron şəbəkə sağlamlıq vəziyyəti ilə ölüm səbəbləri arasında əlaqəni müəyyən edib və insanların ölüm tarixini təxmin etməyə imkan verən alqoritm hazırlayıb.

“life2vec” hazırda geniş yayılmayıb. Çox güman ki, etik məsələlərə görə kütləvilik qazanmayacaq. Alimlər hələlik texnologiyanı inkişaf etdirməyi planlaşdırmırlar. “Nature Computational Science” jurnalında dərc olunan məqalədə deyilir ki, yeni süni intellekt alqoritmi neyron şəbəkələrin proqnozlaşdırma imkanlarının nələrə qadir olduğunu cəmiyyətə təqdim etmək üçün yaradılıb.