Qarlı havalarda məktəblər bağlanmalıdırmı? – Ekspert rəyi

Qarlı havalarda məktəblər bağlanmalıdırmı? – Ekspert rəyi

Müxtəlif hava şəraitində – qarlı, şaxtalı, yağışlı və küləkli olmasından asılı olmayaraq tədrisin fasiləsizliyi təmin edilməlidir. Bir neçə gündür davam edən qeyri-sabit hava şəraiti ilə əlaqədar olaraq, artıq bir çox ali təhsil müəssisəsi ya hibrid, ya da distant formada tədrisi davam etdirir. Lakin orta ümumtəhsil müəssisələrinin əsasən yaşayış yerlərinə yaxın olması nəzərə alınaraq məktəblərdə tədris olduğu kimi davam etdirilir.

Məktəblərdə tətil olması və ya distant təhsilə keçidlə bağlı rəsmi qərar yoxdur. Lakin valideynlər hava şəraiti ilə əlaqədar dərslərin təxirə salınmasını istəyənlər və istəməyənlər olaraq iki qrupa bölünüblər.

“Azərbaycan müəllimi” olaraq bu mövzuda ekspertlərin fikirlərini öyrəndik.

Təhsil üzrə ekspert Ramin Nurəliyev bildirib ki, xüsusilə Avropa ölkələrində soyuq iqlim şəraitində belə tədris prosesi fasiləsiz davam edir və dayandırılmır. Çünki qış aylarında soyuq hava və qar yağması adi hal kimi qəbul olunur:

“Buna görə hesab edirəm ki, bizdə də tədrisin davam etdirilməsi doğru qərardır və bu, qarşılaşa biləcəyimiz hallara uyğun yanaşmadır”.

Ekspert əlavə edib ki, əgər ekstremal hava şəraiti yaransa – çox güclü külək və ya qarın hündürlüyü insan həyatı üçün təhlükə yarada biləcək səviyyəyə çatsa (məsələn, bir metr və daha çox olarsa və azyaşlı uşaqların boyunu keçərsə) – bu zaman dövlət tərəfindən xüsusi qərar verilə bilər. O, valideynlərin də narahatlığının anlaşılan olduğunu vurğulayaraq qeyd edib ki, sürüşkən yollarla bağlı diqqətli olmaq vacibdir:

“Ümumiyyətlə, valideynlər övladlarını ümumi təhsil məktəblərinə və ya məktəbəqədər təhsil müəssisələrinə apararkən ehtiyatlı davranmalı və təhlükəsizliyə xüsusi önəm verməlidirlər. Uşaqların yaşadıqları ərazilərə yaxın olan təhsil müəssisələrinə yerləşdirilməsi daha məqsədəuyğundur. Xüsusilə də qış aylarında bu, həm uşaqların təhlükəsizliyini təmin etməyə kömək edir, həm də yol sıxlığının azalmasına töhfə verir”.

Xarici təcrübəyə toxunan ekspert əlavə edib ki, Finlandiya, Norveç kimi soyuq iqlimə malik ölkələrdə hava şəraitindən asılı olmayaraq tədris prosesi davam etdirilir:

“Bu ölkələrdə təhsil müəssisələrinin fasiləsiz fəaliyyəti təmin edilir. Bizdə də soyuq hava şəraitinə uyğun tədbirlər görülməlidir. Xüsusilə sürüşkən yolların yaratdığı təhlükələrin qarşısını almaq və nəqliyyatın təhlükəsiz hərəkətini təmin etmək vacibdir. Bununla yanaşı, ölkəmizdə çox sərt qış iqlimi olmadığı üçün cəmiyyət olaraq bu cür hava şəraitinə tam hazır olmaya bilərik. Lakin bu istiqamətdə görülən tədbirlərin artırılması faydalı olardı”.

Təhsil eksperti Böyükağa Mikayıllı isə qarlı-şaxtalı hava şəraiti ilə əlaqədar olaraq məktəblərin bir neçə günlük onlayn rejimə keçməsini məqsədəuyğun hesab edir:

“Xüsusilə şəhər yerlərində ara yollar buz bağlayır və gediş-gəliş çətinləşir. Buzlu yollar nəqliyyatın hərəkətini çətinləşdirir, tıxaclara və qəzaların artmasına səbəb olur. Məktəb avtobusları və fərdi nəqliyyat vasitələrinin sürüşməsi nəticəsində baş verə biləcək qəzalar narahatlıq doğurur. Müasir texnologiyalar sayəsində onlayn dərslərə keçid təhsilin fasiləsizliyini təmin edə bilər”.

Mütəxəssis əlavə edib ki, soyuq hava şəraiti qrip, soyuqdəymə və digər respirator xəstəliklərin yayılmasını artırır. Şagirdlərin məktəbə getməsi onların xəstələnmə riskini yüksəldir və bu, ümumi tədris mühitinə mənfi təsir edə bilər:

“Bir çox ölkələrdə əlverişsiz hava şəraiti zamanı məktəblər müvəqqəti olaraq bağlanır və ya onlayn təhsilə keçir. Məsələn, Moldovada 2023-cü ilin noyabr ayında əlverişsiz hava şəraiti səbəbindən 361 məktəbdə dərslər dayandırıldı, 20-dən çox məktəbdə isə dərslər onlayn rejimdə keçirildi. Qırğızıstanda da 2023-cü ilin dekabr ayında soyuq hava şəraiti ilə əlaqədar bütün təhsil müəssisələrində ənənəvi tədris dayandırıldı və dərslər onlayn rejimdə aparıldı. Oxşar nümunə olaraq Qazaxıstanı və İranı da göstərmək olar. Türkiyədə 2017-ci ilin fevral ayında qarlı hava şəraiti səbəbindən 8 əyalətdə məktəblər bir günlük bağlandı”.