“Süni intellekt və təhsil: Müasir müəllimin yeni bacarıqları” adlı təlim keçirilib

Azərbaycan Gənc Müəllimlər Assosiasiyasının təşkilatçılığı və Azərbaycan Respublikası Gənclər Təşkilatları Milli Şurasının “Şəbəkə: Gənclər Təşkilatlarının fəaliyyətlərinə dəstək” proqramı çərçivəsində müəllimlər üçün iki günlük “Süni intellekt və təhsil: Müasir müəllimin yeni bacarıqları” adlı təlim keçirilib. Təlimin əsas məqsədi müasir müəllimlərin süni intellekt sahəsində bilik və bacarıqlarını artırmaq, təhsildə rəqəmsal alətlərin daha geniş tətbiqini təşviq etmək olub.

Açılışda AGMA-nın sədri Pərvinə Qədimova layihənin əhəmiyyəti barədə danışaraq müəllimlərin sürətlə inkişaf edən texnologiyalarla ayaqlaşmasının vacibliyini vurğulayıb. Daha sonra AGMA-nın icraçı direktoru Aygün Kərimova təlim proqramını təqdim edib.

Proqram çərçivəsində iştirakçılar süni intellektin təhsildə rolu, fərdiləşdirilmiş tədris, avtomatik qiymətləndirmə, innovativ məzmun yaradılması və interaktiv öyrənmə yanaşmaları ilə tanış olublar. ARTİ Metodik Dəstək və Peşəkar İnkişaf Mərkəzinin şöbə müdiri Səbinə Balayeva tərəfindən keçirilən sessiyalarda ChatGPT, EduaideAI, Khanmigo və DeepSeek kimi süni intellekt vasitələrinin praktiki tətbiqləri nümayiş etdirilib.

Təlimin ikinci günündə “Süni intellekt: problemlər, yeni yanaşmalar və imkanlar” mövzusunda Şəfəq Ələkbərova tərəfindən interaktiv sessiya keçirilib. Təlim həm nəzəri, həm də praktiki fəaliyyətlərlə zəngin şəkildə davam edərək iştirakçıların rəqəmsal bacarıqlarının inkişafına mühüm töhfə verib.

Tədbir bağlanış mərasimi və xatirə fotosu ilə yekunlaşıb.