Corc Vaşinqton Universitetində milli mədəniyyət nümunələrimiz sərgilənib

ABŞ-nin Corc Vaşinqton Universitetində fəaliyyət göstərən Azərbaycanlı Tələbələr Assosiasiyasının təşəbbüsü ilə ölkəmizin tarixi və mədəni dəyərlərini əks etdirən sərgi təşkil olunub.

“Azərbaycan müəllimi” Diasporla iş üzrə Dövlət Komitəsinə istinadən xəbər verir ki, sərgidə Bakı və Qazax xalçaları, milli geyim nümunələri, o cümlədən əl ilə toxunan corablar, eləcə də UNESCO-nun Qeyri-maddi mədəni irs üzrə Reprezentativ siyahısına daxil edilən kəlağayılar nümayiş olunub.Bundan əlavə, azərbaycanlı rəssamların “İpək Yolu” hekayələrindən ilhamlanaraq yağlı boya ilə çəkdikləri əsərləri ziyarətçilərə təqdim edilib.

Tədbir çərçivəsində qonaqlara mədəniyyətimizin müxtəlif istiqamətlərini əks etdirən eksponatlar haqqında ətraflı məlumat verilib. Ziyarətçilər sərgi nümunələri ilə yaxından tanış olub, məlumat broşürləri vasitəsilə əlavə bilgilər əldə ediblər. Eyni zamanda, iştirakçılar üçün interaktiv oyunlar təşkil olunub.

Sərgi məkanında xüsusi foto guşəsi də yaradılıb. Qonaqlar kəlağayı və ənənəvi kişi və qadın geyimlərini geyinərək xatirə şəkilləri çəkdiriblər.

Tədbir zamanı görkəmli Azərbaycan bəstəkarı Üzeyir Hacıbəylinin məşhur “Arşın mal alan” operettasından musiqilər səsləndirilib. Bu əsər sənətkarlıq və milli kimlik mövzuları ilə səsləşərək sərginin ümumi konsepsiyasını tamamlayıb.
Sərgi ziyarətçilər tərəfindən böyük maraqla qarşılanıb.