Rektor: İnklüziv təhsil ali məktəblərin qarşısına ciddi vəzifələr qoyur

"Artıq dörd ildir ki, Bakı Slavyan Universitetində inklüziv təhsilin inkişafına yönəlmiş layihə həyata keçiririk".

Bunu Bakı Slavyan Universitetinin rektoru Anar Nağıyev jurnalistlərə açıqlamasında bildirib.

Rektor qeyd edib ki, “İnklüziv təhsildən inklüziv cəmiyyətə” adlı beynəlxalq elmi konfrans da inklüziv təhsilin inkişafına yönəlib:
"Bildiyiniz kimi, ölkəmizdə inklüziv təhsilin inkişafı ilə bağlı Dövlət Proqramı (DP) qəbul olunub və bu proqram ali təhsil müəssisələrinin üzərinə ciddi vəzifələr qoyur. Bu vəzifələrdən biri də pedaqoji kadr hazırlığında inklüziv təhsilin prinsiplərinin nəzərə alınmasıdır. Bakı Slavyan Universiteti olaraq biz bu istiqamətdə fəaliyyətimizi sistemli şəkildə qurmuşuq. Bu il konfrans “Dayanıqlı və inklüziv universitet modeli” mövzusuna həsr olunub. Əsas məqsəd ali təhsil müəssisələrinin inklüziv model əsasında necə formalaşa biləcəyini, eyni zamanda pedaqoji kadrların hazırlanması prosesində inklüziv təhsil elementlərinin necə tətbiq olunmasını müzakirə etməkdir.

Konfransda Azərbaycanın müxtəlif ali təhsil müəssisələrinin nümayəndələri ilə yanaşı, Türkiyə və Polşanın aparıcı universitetlərinin tərəfdaşları da iştirak edirlər. Müxtəlif panel və bölmələrdə inklüziv təhsilin nəzəri və praktik aspektləri, qabaqcıl təcrübələr və elmi yanaşmalar geniş şəkildə müzakirə olunacaq.

İnanırıq ki, bu cür platformalar inklüziv cəmiyyətin formalaşdırılmasına, eləcə də təhsil sistemində keyfiyyətli və dayanıqlı inkişafın təmin olunmasına mühüm töhfə verəcək".