Novruz bayramı - milli kimliyimizin və ümumbəşəri dəyərlərin rəmzi

Novruz bayramı - milli kimliyimizin və ümumbəşəri dəyərlərin rəmzi

Ən əziz bayramımız olan Novruzu qeyd edirik. Xalqımızın qədim bayramı öz gəlişi ilə hər birimizin evində tamamilə başqa bir ab-hava, xoş hisslər yaradır. Dünyanın yaranışını tarixən ilk yaz günü ilə bağlayan xalqımız üçün Novruz bayramı daha əziz və dəyərlidir. Novruz hər bir azərbaycanlının qəlbinin bayramıdır. 

Novruz baharın gəlişi, təbiətin canlanması, torpağın oyanması deməkdir. Bolluğun, ruzi-bərəkətin və xeyirxahlığın təcəssümü olan bu bayram insanlar arasında birlik və mehribanlığın möhkəmləndirilməsi, bir-birilərinə qarşı diqqət və mərhəmətin göstərilməsi kimi sağlam təməllər üzərində qurulub. Novruz xalqımızın həm də mədəniyyətini, milli-mənəvi dəyərlərini, tarixiliyini özündə birləşdirən, dünyaya tanıdan qədim el bayramıdır. Novruz təkcə Azərbaycanın deyil, ümumilikdə bir çox Şərq xalqlarının qeyd etdiyi əziz bayramlardan biridir. O, həm milli-mənəvi dəyərləri özündə ehtiva edir, həm də bəşəriyyət üçün önəmli olan yenilənmə, birlik və harmoniya ideyalarını əks etdirir. O, insanları birləşdirən, sevgi, barış, birlik və yenilənmə rəmzi olan bir bayramdır. Novruzun qeyd edilməsi təkcə baharın gəlişini deyil, həm də milli folklorun bütün rəngarəng çalarlarını özündə əxz edir. 

Novruz bayramı yalnız fəsillərin dəyişməsi deyil, eyni zamanda birlik, mehribanlıq və yeni başlanğıcların rəmzidir. Hər il martın 20-21-də qeyd edilən bu bayram qədim adət-ənənələrlə müşayiət olunur. Novruzun gəlişindən dörd həftə əvvəl insanlar ardıcıl Su, Od, Yel və Torpaq çərşənbələrini qeyd edirlər. Hər çərşənbə təbiətin tədricən oyanmasını ifadə edir.
Bu bayram vasitəsilə xalqımızın inancları, mifik dünyagörüşü, musiqisi, teatrı, şifahi yaradıcılığı və milli oyunları yaşadılır və gələcək nəsillərə ötürülür. Novruz sadəcə bir bayram deyil, eyni zamanda xalqımızın mədəni kimliyinin qoruyucusudur.
    
"Bu, azərbaycanlıların, Azərbaycan xalqının qəlbinin bayramıdır"

Milli-mənəvi dəyərlərin qorunmasında və inkişafında hər bir xalqın tarixi şəxsiyyətlərinin də üzərinə mühüm vəzifələr düşür. Məhz bu baxımdan dahi şəxsiyyət Heydər Əliyevin tariximiz qarşısındakı xidmətləri sırasında Novruzun yenidən xalqımıza qaytarılması kimi ümummilli məsələni qeyd etmək olar. Və məhz Ulu Öndərin xidmətləri sayəsində milli bayramımız Novruz ötən əsrin 70-80- ci illərində əvvəlki dövrlərlə müqayisədə kütləvi şəkildə qeyd olunmağa başladı. 

Ümummilli Liderin müstəqil Azərbaycana rəhbərliyi dövründə Novruz şənlikləri xalqımızın həyatına əbədi daxil oldu. Dahi şəxsiyyət mütəmadi olaraq hər il xalqımızı Novruz bayramı münasibətilə təbrik etməklə bərabər, həmçinin ümumxalq şənliklərinə qatılaraq  insanlarla səmimi ünsiyyətdə olur, onlarla birgə bayram sevincini yaşayırdı. 

Heydər Əliyev çıxışlarında bayram haqqında bunları deyirdi: "Bu bayram çox qədim tarixə malikdir və əcdadlarımızın bizə töhfəsi, onlardan qalmış mirasdır... Böyük mənəvi gücə malik olan Novruz bayramı ulu əcdadlarımızın bizə verdiyi ən gözəl yadigar olub, Azərbaycan xalqının milli ruhunu və yaddaşını, onun daxili aləmini bütün zənginliyi ilə yaşadır. Təbiətin oyanışının, varlığın yenidən canlanmasının müjdəsini verən Novruz bayramı ən qədim zamanlardan bəri həyat və məişətimizə daxil olmuş, insanlara aydın və işıqlı sabaha, xoşbəxt gələcəyə inam duyğusu bəxş etmişdir... Bu, azərbaycanlıların, Azərbaycan xalqının qəlbinin bayramıdır".

Ümummilli Liderin qoyduğu bu ənənə onun layiqli davamçısı dövlət başçısı İlham Əliyev tərəfindən uğurla davam etdirilir. Novruzun Azərbaycanda dövlət səviyyəsində qeyd edilməsi həm də tarixi keçmişimizə, milli-mənəvi dəyərlərimizə olan hörmət və ehtiramın parlaq nümunəsidir. Azərbaycan Prezidentinin hər il bu gözəl bayramın gəlişi ilə bağlı xalqa ünvanladığı təbriklər, birinci xanım Mehriban Əliyeva ilə Novruz bayramı münasibətilə Bakıda keçirilən ümumxalq şənliklərində iştirak etməsi, onların İçərişəhərdə tonqalı alovlandırması xalqla bir araya gələrək bayramı birgə qeyd etmələri dövlətin milli dəyərlərə verdiyi önəmin göstəricisidir.  

Novruzun beynəlxalq müstəvidə tanıdılması

Novruzun beynəlxalq müstəvidə tanıdılması və qorunması isə məhz Azərbaycan Respublikasının Birinci vitse-prezidenti Mehriban xanım Əliyevanın çoxşaxəli fəaliyyəti ilə bağlıdır. 
2009-cu ilin sentyabrın 30-da xalqımızın əziz bayramı Novruz YUNESKO-nun qeyri-maddi mədəni irs siyahısına daxil edilmişdir. Bu, Azərbaycanın milli irsinin dünyada tanınması və qorunması istiqamətində atılmış əhəmiyyətli addımlardan biridir. 

Novruz bayramı təkcə milli bayram olmaqla qalmır, həm də ümumbəşəri dəyərləri özündə ehtiva edir. BMT-nin Baş Məclisi isə martın 21-ni “Beynəlxalq Novruz Günü” elan etmişdir. Bu qərar Novruzun sülh, həmrəylik və mədəni müxtəlifliyin təcəssümü olduğunu bir daha sübut edir. Mehriban Əliyevanın rəhbərlik etdiyi Heydər Əliyev Fondu Novruz bayramının geniş miqyasda qeyd olunmasına və bu dəyərlərin gələcək nəsillərə çatdırılmasına xüsusi önəm verir. 

2007-ci ildə Novruz bayramı ərəfəsində Mehriban xanım Əliyevanın təşəbbüsü ilə “Hərəmiz bir ağac əkək” kampaniyasına start verilmişdir. Ekoloji problemlərin həllinə töhfə olan bu layihə çərçivəsində respublikanın bütün guşələrində yüz minlərlə ağac əkilmiş, yeni parklar və bağlar salınmışdır. 

Bu təşəbbüs 2020-ci ildə daha geniş miqyas alaraq İmadəddin Nəsiminin 650 illik yubileyi münasibətilə bir gündə 650 min ağacın əkilməsi ilə nəticələnmişdir. Eyni zamanda, ekoloji tarazlığın qorunmasına yönəlmiş bu təşəbbüs “Yaşıl dünya naminə həmrəylik ili” çərçivəsində də davam etdirilmişdir.

Ölkə başçısı bayram tonqalını azad edilmiş Qarabağ torpağında alovlandırır...

Düz 5-ci ildir ki, Azərbaycan Prezidenti  bayram tonqalını azad edilmiş Qarabağ torpağında alovlandırır. 2021-ci ildə Şuşada, 2022-ci ildə Suqovuşanda, 2023-cü ildə Talış kəndində, 2024-cü ildə Xankəndi şəhərində, bu dəfə isə birinci xanım Mehriban Əliyeva ilə Ağdərənin Həsənriz kəndində sakinlərlə birlikdə Novruz tonqalını alovlandırıb. Artıq Novruz bayramı Qarabağın hər guşəsində, azad edilmiş kəndlərimizdə, şəhərlərimizdə qeyd olunur. İşğaldan azad edilmiş torpaqlarımızda bayram tonqalları qalanır, doğma yurd-yuvalarına qayıdan soydaşlarımız bu gözəl bayramı qəlb rahatlığı, könül xoşluğu ilə keçirirlər. 

Və bu, xalqımız üçün təkcə bir bayram sevinci deyil, tarixi Zəfərin və bütöv Azərbaycana dönüşün sevincidir. Beş ildir ki, bahar Qarabağa qələbə çələngi ilə gəlir, çiçəkləri zəfərin ətri ilə açılır, küləkləri Vətən torpağının səsini pıçıldayır. Alovlanan bayram tonqalları təkcə baharın müjdəsi deyil, bütün dünyanın şahid olduğu bir qayıdışın, haqqın bərpasının və Azərbaycan xalqının sönməz ruhunun alovudur.

Novruz bayramınız mübarək!